| 
  • If you are citizen of an European Union member nation, you may not use this service unless you are at least 16 years old.

  • You already know Dokkio is an AI-powered assistant to organize & manage your digital files & messages. Very soon, Dokkio will support Outlook as well as One Drive. Check it out today!

View
 

Adabu amarikani ad iaaqeb wid yellan mgal tsertit-nnes deg Lairaq ed Lubnan

Page history last edited by takelsertit 13 years, 11 months ago

 

Adabu amarikani ad iεaqeb wid yellan mgal tsertit-nnes deg Lεiraq ed Lubnan

 

 

Sγur Michel Chossudovsky ed Matthew Rothschild

 

 

Seg 2007 ar ass-a, Iwunak Yeddukklen bdan ttekksen-asen ayla-nsen i yemdanen ay ibedden mgal tsertit-nsen deg Lεiraq ed Lubnan. Leqwanin-a imaynuten ay d-yessuffeγ udabu amarikani i lmend n waya, d wid ay izemren ad ḥazen ama d ibeṛṛaniyen izedγen deg Yiwunak Yeddukklen, ama d iγermanen (citoyens) n tmurt-a, yerna zemren ad ttuεaqbel gar taγawsa s yiγil, ama s talwit. Ṛṛay-a d Bush ay t-id-ijebden d amezwaru, maca ula d Obama mazal yettkemmil ixeddem yes-s. D acu kan, leqwanin am wi ffγen ur ttqadaren Tamenḍawt (constitution) tamarikanit, am wakken ur ttqadaren Arkawal n yizerfan iγarimen ed yisertiyen (Pacte des droits civils et politiques) n Yeγlanen Yeddukklen (ONU) ay tessenya ula d Washington.  

 

20 Mayyu 2010

 

Tameskant (manifestante) mgal wemgaru (ṭrad) n Lεiraq, tettwaḍḍef deg Washington, deg Meγres 2008

 

Aselway George Bush yessenya snat n tanaḍin (décrets) ay yekfa ttesriḥ i Lxezna n Yiwunak Yeddukklen akken ad as-tekkes ayla-nnes i yal amdan ay yettwali udabu yezmer ad iḍurr, ama s webrid usrid neγ arusrid, lecγal n Yiwunak Yeddukklen deg Wegmuḍ (Ccerq) Alemmas. Tanaḍt tamezwarut isem-nnes “Tukksa n wayla i kra n yemdanen ay izemren ad ḍurren asserked n Lεiraq”, yessenya-tt Bush deg 17 Yulyu, 2007, tefka ttesriḥ i umaru n Lxezna, sdeffir ma yemcawaṛ ed uneγlaf n tγawsiwin n beṛṛa akked win n temḥaddit, i wakken ad asen-yekkes ayla-nsen i yiγarimen [citoyens] neγ tuddsiwin [organisations] ay izemren ad ḍurren “s webrid usrid neγ arustid” lecγal ay ttgen Yiwunak Yeddukklen deg Lεiraq

 

Tanaḍin* n Bush

 

*décrets

 

« Ssuffγeγ-d yiwen n lameṛ i lmend n tukksa n wayla i medden ayγef yetbet 1) gan neγ zemren ad gen lecγal n tekriḍt (violence) ara iḍurren neγ zemren ad ḍurren talwit ed werkad n Lεiraq neγ anabaḍ (lḥukuma) n Lεiraq, neγ lecγal ay izemren ad ḍurren allus (aεiwed) n lebni n tdamsa taεiraqit neγ asemmeskel (réforme) n tsertit-nnes ; 2) ullen (εawnen) ama s yedtimen, ama s ttawil, ama s tlujistit, ama s tteknit (technique), ama s wayla neγ s lxedma, i wakken ad ttekkin deg lecγal-a n tekriḍt neγ akken ad allen kra n wemdan umi yettwakkes wayla seddaw n lameṛ-a … ».

 

Iγef wis 5 n tanaḍt-a (décret) yenna-d « imi ay llan ttawilat ara yejjen amdan ad yesserwel, deg yiwet kan n teswiεt, akk idrimen-nnes neγ ayla-nnes, ur yenfiε ad asen-yettuεeyyeg γef tukksa n wayla-nsen. Γef waya ay εezmeγ (…) ulayγer ma nuzen-as i win terza temsalt aεeyyen [γef tukksa n wayla-nnes] … » [s wawal niḍen, win umi ara yettuεaqben s lqanun-a, ad as-yettwakkes wayla-nnes war ma εeyynen-as-d, i wakken ur iseεεu akud ad t-yesserwel].

 

Deg 1 Γuct n 2007, Bush yessuffeγ-d tanaḍt (décret) niḍen icuban tinna, isem-nnes « Tukksa n wayla n yemdanen ay izemren ad ḍurren tanaya [souverainté] n Lubnan neγ iberdan ay d-tuwey i lmend n lebni n tugdut akked tsuda-nnes [institutions] ». Amur ameqran seg wayen ay d-yeddan deg tanaḍt-a iga swaswa am wayen ay d-yeddan deg tmezwarut-nni γef Lεiraq, d acu kan, tanaḍt-a n Lubnan tessefra aεaqeb d ameqran ugar i wid ara yettuεaqben yes-s. 

 

Yuγ lḥal, tanaḍin-a (décrets) deg snat yid-sent ffγent i Tmenḍawt (constitution) tamarikanit, imi ay fkant ttesriḥ srid i Lxezna i wakken ad tekkes ayla n medden ay izemren ad ḍurren s tekriḍt (violence) neγ zemren ad ttekkin (war ma tessebgen-d tanaḍt-a amek) deg lecγal mgal tsertit n Yiwunak Yeddukklen.

 

D acu kan, tanaḍt-nni (décret) n 1 Γuct 2007 yezmer ad yettuεaqeb yes-s yal amdan ay igan neγ ay zemren yemḍebbren imarikaniyen ad walin yezmer ad iḍurr, ama s yiγil neγ s leqdic amelwi (pacifique), tasertit tamarikanit deg Lubnan. Lqanun-a yefka daγen ttesriḥ i tukksa n wayla n « wecrik n tudert n wemdan-nni ay terza temsalt neγ n wegrud yellan ddaw n leεnaya-nnes ». Tanaḍt-a ay yerzan Lubnan tegdel (temneε) medden i wakken ad szedγen, ad dawin neγ ad sseccen amdan umi ara yettwakkes wayla s webrid-a, yerna ur t-ttallen (ttεawanen) ma yenḍerr, s netta s « yigerdan yellan ddaw leεnaya-nnes ».

 

Yuγ lḥal, awal n tanaḍin-a (décrets) ur iban mliḥ unamek-nsen (lmeεna), yerna iban ffγen i Tmenḍawt (constitution) n tamarikanit. Yuγ lḥal, s wawal amatu am wa, tanaḍin-a zemrent ad ttwafehment s yiberdan yemgerraden, yerna s waya, yal amdan deg Yiwunak Yeddukklen yezmer ad as-yettwakkes wayla-nnes s ssebba neγ s tayeḍ, yerna, nnig waya, yezmer ad yettwaεzel, yiwen ur t-yettalel (ur t-yettεawan).

 

Bruce Fein d abugaṭu yekkaten γef uqader n tmeḍawt (constitution) tamarkanit, yerna yella zik iqeddec deg Weγlif (ministère) amarikani n Teγdemt (Justice), ddaw n udabu n Reagan. Ass-a, yewhem mliḥ mi d-ffγen leqwanin-a : « Seg wakken aḍris-nsen d amatu, arma ay ur tezmireḍ ad ten-tfehmeḍ akk. Werjin ẓriγ leqwanin imuta, iweεṛen i wefham am wi. Timsal-a εeddant i rrebrab, asseqdec n tekriḍt [violence] neγ tuggza [menace] s usseqdec n tekriḍt, yerna leqwanin am wi d wid ay yessagaden agdud ed ttruẓun-as ifadden akken ad gen kra ».

 

Deg yiwet n tgejdit (éditorial) ay d-yura deg weγmis n Washington Times, Fein yenna-d : « Amdan umi ara yettwakkes wayla ad t-εezlen am win yuḍnen tterka. D Lxezna ara as-yekksen idrimen-nnes war ma tεeyyen-as, yerna war ma tejja-as tawwurt i wakken ad idafeε γef yiman-nnes ma yella yettwaḍlem. Lqanun am wa yezmer ad iwet yiwen am ssiεqa, war ma yebna fell-as. Win umi yettwakkes wayla, ad yettwaεzel imir-nni kan, yerna ur yettalas ad yettuεawen. Wid yebγan ad gen deg-s lxir ur ttalasen ad as-d-aznen idrimen, wala sselεa, wala tallalt niḍen. Ibugaṭu ur izemmer ad t-iḥudd war ma yeffeγ i lqanun-a. Imsujji (aḍbib) ur izemmer ad t-idawi ma yella yeḥbes wul-nnes (…) Yuγ lḥal, Aγlif n Teγdemt (Ministère de la Justice) amarikani yessenqad tanaḍin (décrets) ay d-ssuffuγen yemḍebbren i wakken ad iẓer ma mṣadant ed Tmenḍawt. Maca tikkelt-a, waqila, Aneγlaf n Teγdemt yeḍḍes“.

 

Timerniwt sγur Matt Rothschild

 

Γef wakken ttwaliγ, isali-a ur as-kfin akk azal ttawilat n yisalan imeqranen. Mi ddiγ γer tmurt [Iwunak Yeddukklen] i wakken ad geγ kra n yisaragen (conférence) deg unebdu yezrin, bedreγ-d tamsalt n tanaḍin-a (décrets), dγa yelfa-d medden ur slin yes-sent, wehmen yerna nnan-d amek ur ẓrin yella waya. Ula d nekk d aya ay iyi-yeswehmen.  

 

Sγur Michel Chossudovsky

D anemhal deg Wammas n unadi γef ussemḍel [mondialisation] deg tesdawit n Ottawa (Kanada). D amaẓrag n udeg n « www.mondialisation.ca »

 

Matthew Rothschild

D anemhal n tira n tesγunt The Progressive (deg Yiwunak Yeddukklen)

 

 

Taγbalut: http://www.voltairenet.org/article165338.html

 

 

 



Comments (0)

You don't have permission to comment on this page.