Wid yenγan yessekf ad ttwaṭṭfen
Sγur Khalid Amayreh
16 Dujembeṛ 2009
Seg melmi kan, London tessuffeγ-d lewkala i lmend n tuṭṭfa n Tneγlaft tisṛayilit taqburt n Tγawsiwin n beṛṛa, Tzipi Livni, yerna aya ur deg lbaṭel.
Tameṭṭut-a akked sin yemḍebbren isṛayiliyen niḍen, Ehud Olmert ed Ehud Barak, d nitni ay d imḍebbren n unabaḍ (lḥukuma) isṛayili ay yekfan lameṛ yerna ḍefren assenger n yimezdaγen n Γezza ilindi lawan-a.
Livni tella seg yemḍebbren imeqranen deg ṛṛay-a n tmenγiwt n Yiγezzawiyen, yerna teqdec d timḍebbert deg usseddu n tnegzart-a (massacre) seg tazwara arma d taggara.
Ur neḥwaj ad d-nesmekti ṛṛay n Livni akked win n yemḍebbren niḍen yettekkan deg tenγi-a d win yessawḍen γer tmattant n wugar n 1440 n medden, gar-asen aṭas n yigerdan ur ngi kra n ddenb, d wid yemmuten s tleffuγin (lbumbat) ay d-yeγlin fell-asen ama seg yigenni, ama seg lberr, ama seg yilel (lebḥeṛ). Tanegzart-a (massacre) tegla-d daγen s lεaṛ ameqran n uhuddu n umur ameqran seg tdumṣ̣uka taγarimt (infrastructure civile) n Γezza, d win aydeg ddan yigiman (luluf) n yexxamen, timesgidiwin ed waṣ̣uken izuyaz (édifices publics) seg yal ṣ̣ṣ̣enf.
Tameṭṭut-a timceṛṛit taciṭanit teẓra yerna tεemmed γef wayen tga. Tella teẓra iserdasen isṛayiliyen (icuban iγallen inaziyen n SS) llan neγγen igerdan deg yirebbiyen n tyemmatin-nsen, snegren tiwaculin s lekmal-nsent, d tiwaculin ay ixelεen yerna llant ffrent deg yibeṛṛaken-nsent n yezruzaγ (réfugiées) neγ deg yimukan niḍen aydeg εerḍen ad ḥudden iman-nsen seg tmattant.
Livni tella tettḍafar lεar-nni n uhuddu ed tmenγiwt n Γezza deg tilibizyu. Tuddsiwin (organisations) n yizerfan n wemdan, gar-asent tella ula d tuddsa tisṛayilit n B’tselem, εeyynent-as γef yiserdasen isṛayiliyen ara ineγγen iγarimen (civils) s tmeεmada. Maca nettat tesmenyaf ad tesεuẓẓeg γef wayen ay ẓran akk medden.
Aγerya ad tekf lameṛ akken ad ḥebsen timen’viwt-a, nettat teqdec akken ad tesseddu tazniwt (propagande) tisṛayilit, dγa terra-d ḍḍelm γef wid-nni yemmuten yerna tetthem amussu n Ḥamas s usseqdec n yemdanen akken ad iḥudd iman-nnes.
Ttbut ara d-yessknen attekki n tmeṭṭut-a timceṛṛit deg tucmitin-a d ayen yeggten. Yuγ lḥal, tameṭṭut-a d tamtilt n Adolph Hitler. Ifassen-nnes ccuṛen d idammen n yigerdan ed yergazen ed tlawin ur ngi kra n ddenb.
Livni tezmer ad tesεu lḥeṛma tadiplumatit, maca lḥeṛma tadiplumatit ur tekfi ttesriḥ i bab-nnes akken ad ineγ igerdan war ṛṛeḥma akken ay tga Livni 12 wayyuren aya.
D ayen yesseḥzanen mi ara nẓer anabaḍ (lḥukuma) abriṭani ur tt-yefri ed yiman-nnes yerna ikukra ad as-yini i Isṛayil ed yemḍebbren-nnes ur d-kkin sennig n lqanun n lejnas wala lqanun abriṭani, yerna yessekf ad ttuḥasben.
Tagelda Yeddukklen ur yessekf ad teεfes lqanun-nnes i wakken ad teṣ̣ṣ̣er iniγi n wemgaru (criminal de guerre), win yesnegren igduden yerna yegla ula s yigerdan.
Timenγiwt d timenγiwt, akken yebγu yili ddin n win ay tt-igan. Ẓriγ llan kra n leḥsabat idiplumatiyen ed yisertiyen ay iḥeṛsen anabaḍ (lḥukuma) abriṭani akken ad inadi tifrat ay yes ara isaεef Isṛayil.
D acu kan, asaεef, akken neẓra akk, d ayen ara as-igen ifadden i Isṛayil akken ad ternu ad teg ugar n tenγa (crimes) ay yes ara tessenger Ifalesṭiniyen ed yiγerfan (ccuεub) niḍen uḍεifen n Wegmuḍ Alemmas. Yuγ lḥal, timenγiwt ur nettuεaqeb tetteg ifadden i umenγay.
Maca anabaḍ (lḥukuma) abriṭani d adafeε ay idufeε γef tikli tanazit n Isṛayil ay yenγan agdud deg Γezza, yerna, γef wakken d-nnan kra n yisalan, ula d Aneγlaf abriṭani n Tγawsiwin n beṛṛa, David Milliband, yenna-d lewkala-a n tuṭṭfa n Tzipi Livni “ur tettwaqbal”. D aya ay izemren ad yessiweḍ anabaḍ-a γer tegnit iweεṛen.
Tamezwarut, yessekf γef unabaḍ (lḥukuma) abriṭani ad d-yekf ttbut aydeg ur nelli ccek ara yessizedgen Isṛayil seg ttehma n tenγa n wemgaru (crimes de guerre) ed tenγa mgal talsa (crimes contre l’humanité). Yuγ lḥal, ad yewεeṛ fell-as waya mi ara nẓer deg 21-nni n wussan n tmenγiwt ed uhuddu n Γezza, Isṛayiliyen sqedcen imrigen (leslaḥat) n tmattant, gar-asen ad d-nebder afusfuṛ amellal, timeẓdiyin n tseddi (missiles de precision) ed tleffuγin (lbumbat) yettwanhaṛen s laser. Anect-a akk sqedcen-t mgal yimezdaγen n Γezza ur nesεi acemma akken ad ḥudden iman-nsen.
Tzipi Livni, taneγlaft taqburt n tγawsiwin n beṛṛa n Isṛayil,
d yiwet seg yemḍebbren n ussenger n yimezdaγen n Γezza
D acu kan, γas ma yella anabaḍ abriṭani ad d-yini aya ur yelli d tinγi (crime), yiwen ur yezmir ad yekf azal i wanect-a imi taseqqamut n tsestant (enquête) n Yeγlanen Yeddukklen (Nations Unies) n lqaḍi Richard Goldstone testeεṛef yerna tenna-d ayen tga Isṛayil deg Dujembeṛ ed Yennayer [2008-2009] d tinγa n wemgaru (crimes de guerres) yerna d tinγa mgal talsa (crimes contre l’humanité).
Maca γas ma yella anabaḍ (lḥukuma) yeqbel aṛabul n Goldstone, mazal-it yugi ad yejj ccṛeε abriṭani ad icaṛeε tameṭṭut-a taciṭanit imi ay yesεa kra n leḥsabat idiplumatiyen ed yisertiyen, dγa s waya, anabaḍ abriṭani yessken-d amek ay iga meḥyaf akked Isṛayil ed wamek ay yeεfes γef lqanun abriṭani s lekmal-nnes.
Yuγ lḥal, taγdemt (justice) ay yettεaqaben kra deg lweqt aydeg tejja kra niḍen ad gen ayen ay asen-yehwan ur telli d taγdemt.
Γef waya, anabaḍ (lḥukuma) abriṭani ur yessekf ad yagad seg wenbac n Yisṛayiliyen neγ seg tuggziwin-nsen (menaces). Ass-a, Isṛayil teggul ur tettajja Tagelda Yeddukklen ad tettekki deg wayen umi semman “akala (processus) n talwit” lemmer ad ttwaṭṭfen yiniγiyen n wemgaru (criminels de guerre) ibriṭaniyen neγ ad ttucaṛεen deg yexxamen n ccṛeε ibriṭaniyen.
Ass-a, Tagelda Yeddukklen ur yessekf ad tejj Isṛayil ad tt-tenbec. Yuγ lḥal, Isṛayil d Awanak iniγi (Etat criminel) yerna d win ay d-yennulfan ed mazal-it yedder ala s tmenγiwt n medden, s ussizdeg itni (épuration ethnique), s tukerḍa n wakal ed lekdubat.
Ad d-iniγ awal aneggaru i yiserdasen-nni ur nettwassen ara iqeddcen i lmend n weḍfar ed wekcaf n yiniγiyen n wemgaru (criminels de guerre) isṛayiliyen: d kenwi ay d ttawil ay yesseqdac Ṛebbi akken ad ẓren yiniγiyen-a idammen n wid-nni yettwanγan deg lbaṭel sεan azal.
Ihi ḍefrem-ten anda ma ddan, qaqrem-ten, sḥeṛsem fell-asen deg yal amkan yerna qedcem i wakken ad ttwaṭṭfen yerna ad ttwaḥebsen.
D aya ay aγ-ttalasen yigerdan-nni yemmuten deg lbaṭel, wid-nni ay yettwamḥan war ṛṛeḥma s ufus n Yinaziyen n wass-a. S waya ay nezmer ad asen-d-nessiγ taγdemt (justice) i nitni ed twaculin-nsen. Nexdeε-iten asmi ay llan ddren imi ur nessaweḍ ad ten-nḥudd seg Yinaziyen n wass-a. D acu kan, ur yessekf ad nεawed ad ten-nexdeε ed ad ten-neḥṛem seg teγdemt aydeg ttalasen, γas mmuten.
Sγur Khalid Amayreh
Tasuqilt: Omar Mouffok
Taγbalut: http://palestinethinktank.com/2009/12/16/get-the-war-criminals-arrested-now/
Comments (0)
You don't have permission to comment on this page.