Tabṛat n Cynthia McKinney seg Lḥebs isṛayili

02 Yulyu 2009

Nekk d Cynthia McKinney yerna ssawaleγ-d seg yiwet n texxamt n lḥebs n Ramle, deg Isṛayil. [Nekk d yiwet] seg

21-nni n yimeγnasen n yizerfan n wemdan n umussu (mouvement) n Free Gaza, ay yettwaḥebsen imi ay εerḍen ad ssiwḍen isafaren, iγunam (ikeryunen) i yigerdan akked tnegwa (matériaux) n lebni γer Γezza. Nekk uwyeγ yid-i tabalizt teccuṛ d iγunam i yigerdan. Mi nella ntteddu γer Γezza, Isṛayiliyen ggzen-aγ (menacer) ad qerrsen γer uγerrabu-nneγ, maca nugi ad neqqel. Sakk-in, Isṛayilen ulyen-d γer uγerrabu-nneγ yerna ṭṭfen-aγ imi kan ay nella nebγa ad nessiweḍ iγunam i yigerdan n Γezza. Sakk-in nettwaḥbes, yerna nebγa ad ẓren yemdanen n umaḍal amek ay aγ-gan wid-nni ay aγ-yeṭṭfen imi kan ay neεreḍ ad nessiweḍ tallalt (lemεawna) i wid yenḍerren deg Γezza.

Mi d-tebda Temhelt (opération) tisṛayilit umi semman ”Aldun Yeqquren” [deg Dujembeṛ 2008], rekbeγ deg yiwen seg yiγerruba n umussu (mouvement) n Free Gaza sdeffir ma εeyyneγ-asen yiwen wass uqbel γef tisin-inu, yerna εerḍeγ, s yisem-inu d tagensast (représentante) n Yiwunak Yeddukklen deg terbaεt-a tagtaγlant (multinationale), ad ssiwḍeγ 3 n yiṭunen n tallalt (lemεawna) i udawi n medden deg tama-nni n Γezza ay yellan yagi tettwaxneq yerna tenger.

Cynthia McKinney sdat n uγerrabu n Dignity, deg Dujembeṛ 2008,

qbel ad bdun abrid γer Γezza

Deg wussan-nni n Temhelt (opération) n ”Weldun Yeqquren”, isafagen (avions) n F-16 ay tekfa Marikan i Isṛayil bran-d i ugeffur-nsent n tmes γef yimezdaγen n Γezza ay yettwaṭṭfen deg tefxet. Assizdeg itni (épuration ethnique) teqqel d assenger n weγref (génocide). Afusfuṛ amellal, uṛanyum igellil, iṛubuten, tileffuγin (lbumbat) n DIME akked tleffuγin tiftatasin (à fragmentation) ay d-tekfa Marikan i Isṛayil d imrigen (leslaḥat) imaynuten ay d-yettgen lejruḥ ay werjin diwan-ten yemsujjiyen uṛduniyen ed yinuṛwijiyen [ay yellan ttwadin imejraḥ deg Γezza, d tanqiḍt n yemsuqqel]. Imsujjiyen ay yellan deg Γezza deg wussan-nni ay deg ay temmeγ Isṛayil γef tama-a, nnan-iyi-d Γezza teqqel d inegmi (laboratoire) n Isṛayil i lmend n weεraḍ n yemrigen, d amkan anda ay tesseqdac medden i wakk-n ad tẓer anect ay zemren yemrigen-nnes ad t-nγen.

Medden, deg umaḍal, walan takriḍt (violence) tameḥqurt ay tesseqdec Isṛayil deg Γezza deg tregwa am Al-Jazeera s taεṛabt akked Press TV s tanglizit. Lliγ ttwaliγ isalan deg tregwa-a srid, kra yekka wass, maca ur deg Yiwunak Yeddukklen, wanag deg Lubnan. Lliγ deg Lubnan acku seg-n ay εerḍeγ, tikkelt-nni tamezwarut, ad dduγ γer Γezza, d acu kan, ass-nni tikli-nneγ tfuk mi d-yeẓdem fell-aγ yiwen n uγerrabu aserdasi isṛayili, yekcem deg uγerrabu-nneγ mi nella deg waman igraγlanen (internationaux) ... Yuγ lḥal, d tamkerra (miracle) imi ay iyi-mazal ass-a ddreγ i wakk-n ad d-aruγ γef tikkelt tis snat anda ara mlileγ ed yiserdasen isṛayiliyen, d tikkelt niḍen, daγen, ay deg ay sxeṣ̣ren yiserdasen isṛayiliyen tuγdaḍt (mission) i lmend n tallat (lemεawna) n yemdanen yenḍerren.

Iduba (autorités) isṛayiliyen εerḍen ad aγ-ḥettmen ad nesteεṛef neffeγ i lqanun, nga tinγi (crime) ... Ass-a, qqleγ d tameḥbust uḍḍun (numéro) 88794 deg Isṛayil. Maca ayγer ara kecmeγ γer lḥebs imi kan ay d-jemεeγ iγunam (ikeryunen) i yigerdan ?

Taṣ̣ehyunit tuweḍ γer tlisa n tzerfa-nnes (légitimité) ma yella d anect-a ara teg i medden ay yumnen s telqey s yizerfan n wemdan imi kan ay qemmren s tmeddurin-nsen i wakk-n ad εawnen igerdan n wiyaḍ. Isṛayil d nettat ay d taqacuct wuγur tessaweḍ tṣ̣ehyunit, maca ma yella Isṛayil tugad γef laman-nnes lemmer ad sεun yigerdan n Γezza iγunam (ikeryunen), ihi nezmer ad d-nini Isṛayil tesṛuḥ abruy aneggaru n tzerfa-nnes, yerna yessekf ad d-ini Isṛayil teqqel d Awanak amezgul (Etat raté).

Imir-a ad ttwaẓẓεeγ seg Uwanak-nni (ddula) ay iyi-d-yuwyen γer deg-a s ubeckiḍ, sdeffir ma yettwaṭṭef uγerrabu-nneγ. Uwyen-iyi-d γer Isṛayil, ur bγiγ. Imir-a, ttwaṭṭfeγ deg lḥebs-a imi ay lliγ sεiγ targit, ssarameγ lemmer igerdan n Γezza ad zewwqen, ad klun (peindre), lemmer imejraḥ n Γezza ad ḥlun, lemmer ixxamen ay yeγlin s tleffuγin (lbumbat) ad εawden ad ttwabnun.

Maca mi akk-a ay lliγ sdaxel n lḥebs-a, lemdeγ-d taγawsa tamaynut. Tamezwarut, lḥebs-a yeccuṛ d iberkanen: amur ameqran seg wid yettwaḥebsen deg-s d Ityupiyen, yerna ula d nitni llan sεan targit ... am tmeddukkal-nni wukud lliγ deg texxamt n lḥebs (yerna yiwet seg-sent s tadist). Akk-n ma llant εeddant i εecrin n yiseggasen, maca ur uwiḍent tlatin. Γilent γer Tmurt Timqeddest ay d-usant. Llant ttargunt ad ddrent deg-in tudert yifen tin ay ddrent zik deg tmurt-nsent ... Ityupiyen-nni ay yellan feṛḥen s yiman-nsen, s tmurt-nsen ay werjin yekcem-itt-id umehras (colonisateur), ass-a ufan-d iman-nsen seddaw tecḍaḍt n Yiwunak Yeddukklen, tamurt-nsen d tamurt n uεetteb, d tamurt wuγur ay d-ttawyen imeḥbas ibeṛṛaniyen s tuffra i wakk-n ad kemmlen ten-awyen γer tmura niḍen, d tamurt n tuṭṭfa (occupation). Ityupiyen yessekf ad slellin (libérer) tamurt-nsen, imi tasertit n tezmert tameqrant (superpuissance) teqqel tesεa azal ugar n yizerfan n wemdan akked wezref n tgucelmant (autodétermination) n yiγerfan (ccuεub).

Timeddukkal-inu n lḥebs usant-d γer Tmurt Timqeddest i wakk-n ad ddrent deg tlelli, ad rewlent i rrebg ay d-tḥettem tsertit n tezmert tameqrant. Sxeṣ̣rent deg wacemma, wanag d targit kan ay sεant. Usant-d γer Isṛayil acku llant ttxemmiment Isṛayil tewεed-itent s kra. Assikel-nsent (voyage) γer Isṛayil yessukk-itent-id γef Ssudan ed Maṣ̣er, yerna wa d abrid iweεṛen aṭas. Nnig way-a, assikel-nsen yesqam-asent-d γlay. Aṭas seg-sent ur ssawḍent ad ddunt γer lγerba arma ay εettbent fell-asent twaculin-nsent [akk-n ad asent-d-jemεen idrimen ay yes ara ddunt]. Naqal, ddant γer Aseqqamu Aεlayan n Yeγlanen Yeddukklen i Yezruzaγ (Haut Commissariat des Nations Unies pour les Réfugiés). Kfan-asent-d lekwaγeḍ-nsent iwraγen ay yes ara ttwaεeqlent akked uselkin (certificat) akk-n ad tent-ḥudden yemsulta (ibulisen). Nitenti d tizruzaγ ay d-irewlen seg twaγit, yerna ddant γer Isṛayil. D acu kan, mi uwḍent γer tmurt-a, Isṛayiliyen nnan-asent ”deg Isṛayil ur llin Yeγlanen Yeddukklen”.

Imsulta deg-a [deg Isṛayil], sεan ttesriḥ ad ten-ddmen ed ad ten-kfen i yexxamen-nni n ccṛeε n tmurt-a ay deg d taγdemt (justice) n tkellax ay yellan. Tiqcicin-a tucbiḥin, tuẓwirin ay ifeṛḥen s yiman-nsent d nitenti ay d assirem ay d-yeqqimen i twaculin-nsent. Maca targit n Isṛayil texdeε-itent akk-n ay aγ-texdeε akk. Isṛayil tessken-d iman-nnes, s yiwet n tezniwt (propagande) d tameqrant n tkellax, d tamurt tamezwarut wuγur zemren ad rewlen Wudayen ed Yimasiḥiyen i lmend n laman, yerna ula d nekk umneγ s udellel-a war ma meyyzeγ ay-a s telqey. Maca tidet nettat Isṛayil teskerkes γef umaḍal. Isṛayil teskerkes γef twaculin n telmeẓyin-a. Isṛayil teskerkes ula γef telmeẓyin-a s timmad-nsent, yerna atenti imir-a ttwaṭṭfent deg tefxet, deg lḥebs n Ramle. D acu ara neg imir-a ? Yiwet seg tmeddukkal-inu n lḥebs tettru ass-a. Tettwaḥbes deg-a 6 n wayyuren. S yisem-inu d Tamarikanit, ttḥulfuγ lemmer ad ruγ yid-sent, ay-a ur tent-ineffeε deg wacemma. Tasertit n Yiwunak Yeddukklen yessekf ad teqqel xir n wakk-n tella ass-a. Deg lweqt ay deg, ass-a, Obama yekfa 12,8 n yibelyunen (billions) n yidulaṛen i tedγert (élite) tamarikanit n tedrimt, imdanen yeddren deg lḥeṛs, deg yal amkan, llan ttamnen s ussirem, s ubeddel, s wawal-nni ”ih, nezmer!” [ay yella Obama yettales-it-id deg lḥemla-nnes n tefranin], d tiγawsiwin ay ten-yesḍemεen ad ddren deg yiseγ ed ad ḥulfun yiman-nsen sεan azal.

D acu kan, ay-nni akk yelfa-d d lḥemla kan n uγurru ay yes kellxen ama i umaḍal, ama i yiferranen imarikaniyen, am wakk-n ay tkellex, daγen, Isṛayil i umaḍal. Isṛayil tγurr-aγ akk, maca aγurru ay tγurr tilmeẓyin-a meγγer ugar.

Yessekf ad nefren imazwaren (candidats) yifen wid yellan ass-a, d wid ara izemren ad aγ-d-genssen (représenter) xir. Γriγ tabṛat n Dr. Martin Luther King Junior ay d-yura seg lḥebs n Birmingham acḥal d tikkal, yerna werjin, ula deg yir tirga ay urgaγ, xuyleγ iman-inu, ula d nekk, ad d-aruγ tabṛat seg lḥebs. Imawasen (contribuables), ama deg Tuṛuft neγ deg Yiwunak Yeddukklen, yessekf ad gen aṭas n tγawsiwin i wakk-n ad asen-yettusemmeḥ way-n ay gan i wiyaḍ deg umaḍal.

Ur γileγ akk-a ara teḍru yid-neγ! Ass-a ara yebdu memmi tizrawin-nnes (études) n lqanun, yerna nekk ur lliγ yid-s, acku aql-i deg lḥebs imi ay εerḍeγ ad geγ akk ay-n zemreγ, akk-n ay ssneγ, i wakk-n ad εawneγ arraw n medden niḍen. Ssuref-iyi a memmi. Ahat aql-i, imir-a, ttidireγ deg lqerḥ-nni ay yettajjan medden ad ḥwijen tirga. D acu kan, nekk sεiγ zzheṛ. Nekk ad ffγeγ seg wemkan-a. Isṛayil teqqel d amkan anda ay ttmettatent tirga.

Sseqsim imezdaγen n Falesṭin. Sseqsim iberkanen-nni ed Wasyawiyen ara ttwaliγ ttawḍen-d γer lḥebs n Ramle. Sseqsim tisednan yellan anda ay ttwaḥebseγ. Sseqsim iman-nwen: d acu ay tebγam ad t-tgem ?

Yessekf ad neddukkel akk-n ad nbeddel amaḍal yerna ad nessutter ay-n neḥwaj s yisem-nneγ d imdanen: d nnif. Ggareγ-d tiγri i Yeγlanen Yeddukklen (Nations Unies) i wakk-n ad awyen tisednan-nni n Ramle sanda ara zedγent deg laman, imi ur sxeṣ̣rent deg wacemma, wanag γilent kan s Isṛayil d ”taεessast” n Tmurt Timqeddest. Ggareγ-d tiγri i Weγlif (ministère) amarikani n tγawsiwin n beṛṛa i wakk-n ad d-yebder ay-n ara asen-iḍerrun i tezruzaγ-a (réfugiées) ay yesεan lekwaγeḍ n UNHCR deg Isṛayil, ad t-id-yebder deg uṛabul-nnes n yizerfan n wemdan ay d-itteffγen yal aseggas. Ggareγ-d tiγri, tikkelt niḍen, i uselway Obama i wakk-n ad yeddu γer Γezza: azen γer deg-in amazun-nnek uslig (envoyé spécial), George Mitchell i lmend n beddu n lemcawṛat akked Ḥamas ay yefren weγref (cceεb) afalesṭini.

Ad hduγ tabṛat-a i wid yettnaγen i lmend n Falesṭin tilellit, yerna i lmend n tsednan-nni ay d-mlaleγ deg Ramle. Sγur Cynthia McKinney, 2 Yulyu 2009, d tin umi γγaren deg Ramle ”tameḥbust uḍḍun 88794”.

Sγur Cynthia McKinney

Tasuqilt sγur Omar Mouffok

Taγbalut: http://freegaza.org/en/home/56-news/986-letter-from-an-israeli-jail-by-cynthia-mckinney