If you are citizen of an European Union member nation, you may not use this service unless you are at least 16 years old.
You already know Dokkio is an AI-powered assistant to organize & manage your digital files & messages. Very soon, Dokkio will support Outlook as well as One Drive. Check it out today!

Sdeffir n Lâiraq d Colombia

Page history last edited by takelsertit 14 years, 3 months ago

Sdeffir n Lεiraq d Colombia

Sγur Frédéric Delorca

20 Γuct 2009

Deg 15 Yulyu yezrin [2009], anabaḍ (lḥukuma) n Colombia yekcef-d yiwen n usenfar (projet) aydeg yessefray ad yejj igen (armée) amarikani ad yesseqdec sebεa seg yisaduren iserdasiyen (bases militaires) icolombiyen. Venezuela ed Ecuador wtent-d deg tikli-a n Colombia ara yettnadin tadεawt, deg lweqt aydeg Brizil ed Cili nnant-d daγen tamsalt-a « tecγeb »-itent. Amtawa-a (leεqed) amaynut ay gan Yicolombiyen ed Yimarikaniyen d win ara yejjen igen amarikani ad ikemmel ad yili deg Temrikt n Wenẓul (sud) γas akken yettwaγleq usadur-nnes n zik ay yella yesεa-t deg Manta, deg Ecuador.

Taṛakna tazewwaγt i yigen (armée) amarikani

Deg 2006, Colombia tella d nettat ay d tamurt aydeg yettwanγa wemḍan (nombre) ameqran akk n yemsenmula (syndicalistes) deg umaḍal. Nnig waya, d nettat ay d tamurt tis tlata, deg umaḍal, ay d-yesfaydayen seg lemεawna taserdasit tamarikanit sdeffir n Isṛayil ed Maṣ̣er. Colombia tesfayday-d seg lemεawna tamarikanit s yisem n uγawas n yimenγi mgal tehyufin (drogue), win umi semman « Plan Colombia », d acu kan, deg tidet, lemεawna-a taserdasit tettusseqdac i yimenγi mgal yiγallen n FARC* (Iwunak Yeddukklen ay d-yuwyen, zuna, tikli n yimenγi mgal tehyufin, ttεawanent timura niḍen yeddren s tehyufin am Kosovo, nnig waya, seg wasmi ay ṭṭfen Yimarikaniyen tamurt n Afγanistan, tafellaḥt n tjaḥbuḍt ur teḥbis seg unnerni). S yisem n « Plan Colombia » (ay tebγa Washington ad t-tesseqdec ula akked Miksik, Pakistan ed Afγanistan), Imarikaniyen sqedcen ula d imeẓla uffiren (services secrets) ibriṭaniyen ed yespenyuliyen i wakken ad sleγmun (entraîner) iγallen icolombiyen. Imarikaniyen ttakfen 5,5 n yimelyaṛen n yidulaṛen deg useggas i Colombia, deg lweqt ay deg timura tuṛufuyin yettekkan deg Temsisit Taṭlasit (Alliance Atlantique) (am Fṛansa, Lalman, Tagelda Yeddukklen, atg.), ttekkayent ula d nitenti deg uεiwen n tmurt-a : deg useggas n 2007, timura-a kfant 154 n yimelyunen n yidulaṛen d lemεawna taserdasit i Colombia war ma yella-d weskasi (débat) aydeg ara ciwṛent igduden-nsent γef tezdeg n tikli-a. Aselway n Colombia, Alvaro Uribe, d ameddakel n Bernard Kouchner, yerna yemsefham yid-s, seg melmi kan, akken ad d-yebru i Agim Ceku (d yiwen n Ukosovi yettuttehmen s wanγaten n wemgaru [crimes de guerres] yerna yettnadi fell-as Wexxam n Ccṛeε Agraγlan). Nnig waya, yessekf ad nẓer ass-a llan ula d iγallen usligen (forces spéciales) isṛayiliyen deg Colombia, yerna iγallen-a ttekkan ula deg tuttya-nni taserdasit (coup d'Etat) ay d-yellan deg Honduras.

[FARC : Fuerzas armadas revolucionarias de Colombia - Iγallen imsellḥen igrawalen n Colombia, d tagrawt tasduklant (communiste) timselleḥt tameqrant ara yettnaγen mgal udabu n Colombia]

Deg 1 Meγres 2008, Colombia tuzen isafagen (ṛṛublanat) ay d-yebran i tleffuγin (lbumbat) γef yiwen n usadur (base) n yiγallen n FARC deg Ecuador, dγa d aya ay yejjan Ecuador ad tegzem assaγen-nnes idiplumatiyen ed Colombia. Ass-nni, 10 n tleffuγin n 500 kilu ay d-yeγlin γef wakal n Ecuador. Tifelluγin-a d tid ay sseqdacen aṭas Yimarikaniyen deg Lεiraq, yerna yella ccek d isafagen imarikaniyen ay asent-d-yebran γef wakal n Ecuador (imi isafagen icolombiyen ur zmiren ad refden tileffuγin timaẓayin anect n ti).

Deg Yebrir n 2008, aknaner (colonel) Jim Russel yellan d imḍebber n tmehlin (opérations) n US Airforce deg Wenẓul (sud), iger-d tiγri i wakken ad d-ttwajebden kra seg yiserdasen imarikaniyen yellan deg Lεiraq akken ad ttwaznen γer Temrikt Talatinit. Seg 12 Yulyu 2008, bdan yiγerruba n tanawt (flotte) tis ṛebεa n Yiwunak Yeddukklen ttezzin yerna ttεassan tifsirin (côtes) n Temrikt Talatinit, d ayen ay werjin yeḍri seg 1950. Deg Mayyu 2008, yiwen n usafag (ṛṛublan) n yimenγi amarikani ay d-yusan seg tegzirin n Antilles tihulandiyin, yekcem γer lḥeṛma n yigenni n Venezuela. Γef wakken d-nnan yemḍebbren n Venezuela, Imarikaniyen uznen-d asafag-a d amaγlay (espion) γer tezgzirt n La Orchila i wakken ad ẓren ma zemren yiṛadaṛen ivenezueliyen ad t-id-ṭṭfen. Ma d Washington tenna-d anekcum n usafag-a γer lḥeṛma n yigenni n Venezuela d tuccḍa kan.

S waya, Venezuela tḥulfa i yiman-nnes ur telli deg laman, dγa i wakken ad ṭhudd iman-nnes, tessumer-d (proposer), deg Meγres yezrin [2009] ad tejj imesberrawen (bombardiers) irusiyen ad sqedcen isaduren-nnes (bases). Deg wass n Laṛebεa yezrin [12 Γuct 2009], aselway n Venezuela, Hugo Chavez, yenna-d ad yestenyi agatu (leεqed) amaynut n tmesγiwt n yemrigen (leslaḥ) s wazal-nsen γef Rusya, aydeg yessefray ad d-iseγ azal n 40 n yigulla (chars) ed yemrigen niḍen. Chavez yetthem « Amenkud [empire] amarikani » s nneyya-nnes i wakken ad yesseqdec isaduren icolombiyen akken ad yeṭṭef tama ay d-yezzin i wasif n Orenoque, d tin ay d-yezgan deg wenẓul agmuḍan (sud-est) n Venezuela yerna yella deg-s waṭas n upitṛul. Yagi, deg Uwanak (Etat) avenezueli n Zulia, aydeg yella upitṛul, yenker-d yiwen n umussu (mouvement) ay yekkaten i lmend n beḍḍu n tama-a akked Venezuela. Amussu-a umi γγaren « Rumbo Propio » d win ayγef ttḥaṛaben ttawilat n yisalan n tuligaṛkit n Venezuela yellan d imeddukal n Yiwunak Yeddukklen.

S waya, nezmer ad d-nini simal la tzemmeḍ txennaqt γef Venezuela. Yuγ lḥal, Iwunak Yeddukklen sseqdacen ass-a ula d isaduren n Guyana tafṛensist, am wakken ay zemren ad tteklen ad sqedcen ula d akal n Panama, ladγa imi deg Mayyu yezrin [2009], yettwafren uselway n uyeffus deg tmurt-a. Isaduren-a imarikaniyen imaynuten deg Colombia d wid ay izemren ad d-glun s ccwal ula γef tama n yidurar n And akked tama n Amazon aydeg yella nnfeε d ameqran. “Deg tazwara, d apitṛul, sakkin d uzzal akked waman. Ass-a bγan ad ẓedmen γef Lεiraq, maca ur wehhmem ma yella azekka εezmen ad ẓedmen γef tama n Amazon”, ay d-yenna yiwen n udemmas (économiste) amaṣ̣ri, Samir Amin, yettekkan deg “Atlas alternatif”, deg yiwet n temlilit γef tama n Amazon deg Yennayer 2003, deg temdint n Bélem, Brizil. Yessekf ad d-nesmekti: deg wass n 13 Γuct yezrin [2009], igensasen (représentants) n yimezdaγen ineṣ̣liyen n Colombia ccetkan i Usseqqamu n tukksa n meḥyaf gar yiran (discrimination raciale) n Yeγlanen Yeddukklen, γef ljal n lbaṭel ara itteg unabaḍ acolombi deg-sen. Karmen Ramirez yellan d timḍebbert n Tuddsa Taγelnawt n Yineṣ̣liyen n Colombia (Organisación Nacional Indígena de Colombia – ONIC) twet-d deg yixeṣ̣ṣ̣aren ay izemren ad d-kken seg welday n yisaduren iserdasiyen (bases militaires) imarikaniyen deg tama-nsen, yerna tenna-d aya yezmer ad yeg ifadden i wezraε n jjiḥ s yedrimen ed wetεeddi γef lḥeṛma n tlawin n yimezdaγen inṣ̣eliyen.