Obama ed Warraz n Nobel 2009: amgaru ur yettfaka skud llan yemdanen

 

 

 

Sγur Rick Rozoff

 

 

 

*Amgaru : ṭṭrad

 

Ur neẓri ma mazal imeslayen sεan inumak neγ ala, imi, ayen ay d-yenna Uselway Obama deg yinaw-nnes (discours) deg Oslo [i lmend n tuṭṭfa n warraz n Nobel n talwit ay as-yettunekfen] d ayen ay aγ-yejjan ad ncikk. Obama yettḍebbir, ass-a, deg sin n yemgura (ṭṭradat) ay deg Imarikaniyen mmγen γef Lεiraq ed Afγanistan yerna d netta ay d iγef n tnezmart (puissance) tameqrant akk deg umezruy, d acu kan, deg tmeγra n tukci n warraz n Nobel n talwit, yerra iman-nnes d amsalwi (pacifiste). Deg yinaw-nnes, ay deg yesseqdec, war akukru, imeslayen n ddin [am Bush], Obama yenna-d amgaru (ṭṭrad) ay ttgen Yimarikaniyen yella-d deg lmektub, d acu kan, yessanef akk ad d-yessiwel γef wanγaten (crimes) ara d-yettilin deg Wegmuḍ Alemmas s ddaw ṛṛay-nnes.

 

11 Dujembeṛ 2009

 

Aselway ed yemḍebber ameqran n yiγallen imsellḥen n Yiwunak Yeddukklen, Barack Obama, yeγra-d yiwen n yinaw (discours) i lmend n tuṭṭfa n Warraz n Nobel n Talwit ay as-yettunekfen deg Oslo, deg wass n 10 Dujembeṛ, d inaw ay yejjan ttawilat n yisalan ad d-ssiwlen γef tlalit n wayen umi semman “Asekkud [Doctrine] n Obama”. 

 

 

Obama deg tmeγra n tukci n Warraz n Nobel, deg Oslo 

 

 

Obama, deg wawal-nnes, ur yettu ad d-yebder Martin Luther King Jr. ed Mohandas Gandhi (aneggaru-a yebder-it-id kan s yisem-nnes n twacult), d acu kan, ur yettu daγen ad d-yebder iselwayen imarikaniyen niḍen am Ronald Reagan, Richard Nixon ed John F. Kennedy. D acu kan, ur d-yebdir ismawen n yiselwayen imarikaniyen yuwyen, am netta, arraz n Nobel n talwit am Theodore Roosevelt, Woordrow Wilson ed Jimmy Carter. Γas akken, Obama yeγra-d inaw-nnes s laman deg yiman-nnes imi ay yeḥseb iman-nnes d imḍebber n umaḍal, d iγef n tnezmart (puissance) tameqrant yerna yebγa ad d-yessken iman-nnes amzun d nnbi, d amdan azedgan yessawalen s ṣ̣ṣ̣wab ed tmussni. Akken ay as-yenna ufelsuf almani Friedrich von Schlegel: d nnbi yettmuqqulen γer deffir.

 

 

Mi d-yeγra inaw-nnes (discours), Obama yuwey-itt-id am win yettmuqqulen γer lbeεd, yessawal am win iḥesben iman-nnes d imḍebber ameqran. Dγa yenna-d: “Amgaru (ṭṭrad), s kra n talγa (forme) neγ s tayeḍ, yennulfa-d seg wasmi ay d-yennulfa wemdan amezwaru”. Dγa da, ur neẓri d acu d-yeqsed Obama ur d-nekfi ugar n ttfaṣ̣il γef temsalt-a. Yessemεan-d γef wedlis n Txelqit (Génèse) yellan deg Tbibelt ay deg Qabil yenγa gma-s Habil ? Dγa da, ur nefhim ma yella timenγiwt-a yettwali-tt Obama d amgaru (ṭṭrad) yerna Qabil ur yelli d netta ay d amdan amezwaru [imi netta d yiwen seg warraw n Adem]. D acu kan, ayen yessagaden ugar netta, γef leḥsab n Obama ay d-yennan aya, ihi amgaru d aḥric seg tnefsit n wemdan, yerna ur nezmir ad nebḍu amdan γef wemgaru.

 

 

Imassanen, s umata, ttinin-d amdan atrar (moderne), Homo sapiens, iban-d azal n 200.000 n yiseggasen aya, d acu kan, iḍrisen iqburen akk n umezruy ay aγ-d-yeggran ar ass-a sεan kan 2400 n yiseggasen aya. Ihi, amek ay ssawḍen wid-nni ay as-d-yuran inaw-nnes (discours) i Obama ad ẓren imdanen gan imgura (ṭṭradat) deg umezruy-nsen aγezfan n 197.600 n yiseggasen [yili imassanen ur ẓrin aya], amgaru yennulfa-d seg wasmi ay d-yennulfa wemdan yerna ur nezmir ad t-nebḍu γef ḍḍbiεa n wemdan ? Lemmer ad yili uneγmas (amesjeṛnan) ara yesεun tabγest (lkuṛaj) ad yetter Obama γef temsalt-a deg usarag-nnes (conférence) ay d-itteddun, aya ad yili d ṛṛay igerrzen.

 

 

D acu kan, ahat d tamussni izaden ay yejjan Obama ad d-yini aya. Yuγ lḥal, inaw-nnes (discours) ay d-yeγra deg Oslo yeccuṛ d assemεen γef ddin ed tekta ay yes Obama yeḥseb iman-nnes yesεa kra seg ṣ̣ṣ̣ifat n Ṛebbi. Ma deg wayen yerzan timsal n umezruy ed tesnemdant (anthropologie), Obama yettwali tiγawsiwin d tiberkanin, deg yinaw-nnes, yerna aya yekka-d seg “Sidi Ṛebbi” ay d-yegren iman-nnes deg tγawsiwin-a.

 

 

Obama yenna-d “ur yelli Wemgaru (ṭṭrad) Imqeddes ay izemren ad yili d amgaru n lḥeqq. [D acu kan] ma yella tumnem s tidet tettnaγem i wudem n Ṛebbi, dγa  ulayγer ma tkukram”. Sakkin, yerna-d “Iyyam ad naweḍ γer umaḍal-nni ay yessekfen ad yili – yal yiwen seg-neγ yesεa ifeṭṭiwej n Sidi Ṛebbi ay d-yettewliwilen deg teṛwiḥt-nnes”. Dγa da, yessekf ad nger tamawt i yiwet n tγawsa: lemmer d ixṣ̣imen n Yimarikaniyen ara yessiwlen γef Ṛebbi, Imarikaniyen ad ten-ḥesben d ikeddaben, d wid yeffγen i webrid aqeεdan, d wid ur nettqadar lḥeṛma n ddin. D acu kan, mi ara tessiwel Washington s yiwem n Ṛebbi, awal-nnes d tidet, ur yecciḍ, yerna s wawal-a tezmer ad tekf lḥeqq i yiman-nnes ad teg ayen ay as-yehwan, γas ma s  uhuddu akked tmenγiwt. Dγa ta d tamuγli tamanit (manichéiste) tamsarit deg tallit-nneγ n wass-a [tamuγli ay deg yella kan lxir ed cceṛ, yettwalin amaḍal ala s uberkan ed umellal].

 

 

Obama - aselway amarikani amezwaru ay yuwyen Arraz n Nobel yili mazal-it deg udabu deg 90 n yiseggasen-a ineggura – yenna-d deg tezwara n yinaw-nnes: “ahat ugur ameqran akk ay yerzan tuṭṭfa-inu i Warraz-a n Nobel n Talwit netta imi neck d Imḍebber Ameqran n yiγallen imsellḥen n yiwet n tmurt ay iweḥlen deg sin n yemgura (ṭṭradat)” [win n Lεiraq ed win n Afγanistan].

 

 

Obama ur d-yenni awal ay yes ara yekf lḥeqq i Yiwunak Yeddukklen γef wemgaru-nsen (ṭṭrad) deg Lεiraq, yerna nezmer ad nefhem aya [imi seg zik ay yella mgal ukemmel n wemgaru deg Lεiraq], d acu kan, Aselway Amarikani yesteεṛef s uḍebber-nnes deg wemgaru n Afγanistan ed ccwal ara yettnernin deg Pakistan, yerna iṛeggem ad ikemmel waya. Ma d imgura ay d-yettilin anda niḍen, Obama isemma-asen, yerna s tḥeqranit, d Tinmudag (Croisades) Tuṛufiyin n tgara n Tallit Talemmast.

 

 

Aselway amarikani, imḍebber ameqran n yiγallen imsellḥen, yuzen iγallen-nnes i wakken ad nnaγen sin n yemgura (ṭṭradat) γef tikkelt deg snat n tmura ay ibeεden s waṭas γef Yiwunak Yeddukklen, yili iduba ed yiγerfan (ccuεub) n tmura-a werjin llin d tuggza (menace) γef laman n Marikan. Γas akken, Aseqqamu n Warraz n Nobel akked win umi d-iṣ̣aḥ warraz-a gan amzun acemma ur yelli: Obama yeṭṭef-d arraz-nni ay deg tella cciεa akked yedrimen (amelyun ed ṛebεemayt alaf n yidulaṛen).  

 

 

Awal ay nesla deg yinaw-nnes (discours) n weqbal n Warraz n Nobel werjin nesla-t deg yinaw niḍen n Warraz-a deg tallit n talwit. Yuγ lḥal, Obama yenna-d: “aql-aγ deg wemgaru (ṭṭrad), yerna s ṛṛay-inu ay ttwaferqen yigiman (luluf) n yelmeẓyen imarikaniyen i wakken ad nnaγen deg tmurt ibeεden. Kra seg-sen ad nγen, kra ad ten-nγen”.

 

 

Yerna war ma yessetḥa, war ma ikukra, yerna-d : „taknussna tatrart (techlonologie moderne) tga-asen abrid i tkemmict n yemdanen imecṭuḥen ay yeccuṛen d cceḥna, i wakken ad nγen amḍan (nombre) yessexlaεen n yemdanen ur ngi acemma”, d acu kan, deg lweqt ay deg d-yettini awal-a, Obama yettu ula d netta yesseqdac isafagen (ṛṛublanat) war inehhaṛen (wid umi γγaren “idṛunen”), yettwanhaṛen s yigensaten (satellites) i wakken ad nγen medden s tmeẓdiyin (missiles) deg Afγanistan ed Pakistan.

 

 

Yuγ lḥal, s yinaw-nnes (discours), Obama yebγa kan ad aγ-d-yessken, s umata, amek ay mazal Imarikaniyen ttḍafaren tikli-nni ay d-bdan ugar n 10 n yiseggasen aya, seg tazwara n 1999, asmi ay gan amgaru (ṭṭrad) mgal Yuguslavya war ma uwyen ttesriḥ sγur Yeγlanen Yeddukklen (Nations Unies) yerna war ma nudan ad t-id-awyen; Obama yebγa ad aγ-d-yessken s yinaw-nnes Iwunak Yeddukklen ed yal yiwen seg yemsisan-nnes iserdasiyen (alliés militaires) yezmer ad yesseqdec iγil aserdasi (force militaire) beṛṛa i tlisa n tmurt-nnes ed wakken ay as-yehwa deg yal amkan deg umaḍal, yerna zemren ad nnaγen i yiman-nsen neγ d tarbaεt. D acu kan, Obama yebγa ad aγ-d-yessken daγen azref n usseqdec n yiγil aserdasi beṛṛa i tlisa d win ay deg ttalasen kan Yiwunak Yeddukklen, imeddukkal-nnes deg Temsisit Taṭlasit (Alliance Atlantique) ed kra seg tmura wukud tettemεawan deg wenrar n wemgaru am Colombia, Ityupya, Juṛjya, Isṛayil ed Tgelda Tasaεudit.

 

Tifekkiwin n yemdanen yemmuten deg Fallujah, Lεiraq

 

 

D acu kan, ayen yessawhamen deg yinaw n Obama netta d lqella n ukukru mi d-yessawel γef usekkud-a (doctrine) amarikani ay yeffγen i lqanun agraγlan (international). Wi d kra seg wawalen ay d-yenna war tunnḍa n wawal yerna war tuffra:

 

 

“Yessekf ad d-nebdu s westeεṛef n tidet iqerrḥen: ur deg tudert-nneγ ara nessiweḍ ad nefru tilufa n yimenγi ay yellan ass-a. Maca ad d-taweḍ tallit ay deg timura – s leqdic i yiman-nsent neγ s wemεiwen – ad steεṛfent terra tmara ad nesseqdec iγil, nesεa lḥeqq ed llant ssebbat ay ara aγ-yejjen ad t-nesseqdec”.

 

 

Dγa, i wakken ad yekf lḥeqq i Yiwunak Yeddukklen ad sqedcen iγil, yenna-d yiwen n wawal, ad as-tiniḍ wid-nni ay as-yuran inaw-nnes neqqlen-t-id seg Wikipedia:

 

 

“S yisem-inu d imḍebber n tmurt ay yeggullen ad ḥuddeγ tamurt-inu, ur zmireγ ad ḍefreγ ala imedyaten-nsen [Gandhi ed King]. Dγa qubleγ amaḍal akken yella, yerna ur zmireγ ad qqimeγ ur ttgeγ acemma skud llant tuggziwin (menaces) ay izemren ad ḍurrent aγref (cceεb) amarikani. Yuγ lḥal, ur yessekf ad teccḍem: Cceṛ yella s tidet deg umaḍal”.

 

 

“Nekk – am wakk imḍebbren n tmura – ttalaseγ ad geγ kra seg tama-inu, ma terra tmara, i wakken ad ḥuddeγ tamurt-inu”.

 

 

Ameslay n “cceṛ” yettusseqdec snat n tikkal deg yinaw-a (discours) yerna Obama yenṭeq-it-id s tasmuḍi, am win ur nesεi ṛṛeḥma, deg wawal-nnes ay icuban lxeḍba n ddin.

 

 

D acu kan, kra seg wawalen ara aγ-yejjen ad nḥulfu i lqella n ṛṛeḥma, nezmer ad ten-id-naf mi d-yenna:

 

 

“Allalen n wemgaru (instruments de guerre) sεan dduṛ n tidet deg weḥraz n talwit ».

 

 

« Leqdicat n talwit ur ssawḍen ad ḥebsen iγallen n Hilter. Yerna lemcawṛat ur zmirent ad qennεent imḍebbren n Al-Qaεida i wakken ad ssersen imrigen (leslaḥ). Dγa, ma nenna-d tikkal terra tmara ad nesseqdec iγil, aya ur yebγi ad d-yini neggar-d tiγri i wakken ad neffeγ i yiberdan … »

 

 

“Bedreγ-d tamsalt-a, bdiγ-d s temsalt-a acku, ass-a, aṭas n tmura ay yettwalin asseqdec n yiγil aserdasi (force militaire) yezmer ad yili yelha am wakken ay yezmer ad yili dyiri-t, yerna ur ttnadin γef ssebba ay yessawḍen γer usseqdec-nnes. Yerna tikkal, llan ula d wid ay yettcikkin ula deg Marikan akked nneyyat-nnes, imi d nettat ay d tanezmart (puissance) tameqrant tawḥidt deg umaḍal ».

 

 

Aqaren n tkemmict n yimaslaḍen (membres) n Al-Qaεida γer yiγallen imsellḥen n Hitler d ayen yekkan i tlisa. Akken yebγu jehden wid yettekkan deg Al-Qaεida, qrib ur sεin akk imrigen (leslaḥ) ara ssersen. D acu kan, Obama yesεa aṭas n yemrigen, imi d netta ay d imḍebber n lxezna n yemrigen tameqrant akk deg umaḍal, ama seg yidis n yemrigen iluganen (conventionnels), neγ seg yidis n yemrigen iγsanen (nucléaires).

 

 

Dγa, abdar n Lalman tanazit yesskanay-d kan zzyada deg wawal, yerna aqaren tallit n Yinaziyen γer tin n wass-a ur yelli d ayen iṣ̣eḥḥan. Yuγ lḥal, asmi ay yekcem Hitler, deg 1936, γer Rheinland, lemmer d ay d-llin yisurifen idiplumatiyen deg lawan, tili ur tettarra tmara ad nnaγent tmura mgal Lalman. D acu kan, deg tallit-nni, Ibriṭaniyen ed Yefṛensisen mεawanen akked Lalman n Hitler, yerna jjan Ṭṭalyan n Mussolini ad teḥṛes - seg yidis n yilel (lebḥeṛ) - Tagduda n Spenyul, yerna jjan isafagen (ṛṛublanat) n Lalman ad d-brun i tleffuγin-nsen (lbumbat) γef temdinin n Spenyul am Guernica ed tiyaḍ, am wakken ay jjan iserdasen n Ṭṭalyan ẓedmen s yigiman (luluf) γef Spenyul akken ad εawnen tanekra n Franco. Nnig waya, Ibriṭaniyen ed Yefṛensisen mlalen deg Munich akked Lalman ed Ṭṭalyan deg 1938 i wakken as-qeblen i Hitler ad yeṭṭef tama n Sudetenland deg Cikusluvakya, dγa d aya ay as-igan ifadden i wakken ad ikemmel ad yeṭṭef timura n wegmuḍ (ccerq). D acu kan, imi amezruy yettεawad-d iman-nnes, 70 n yiseggasen seg wasmi ay ḍrant akk tedyanin-a, rnant mlalent ṛebεa-a n tmura deg Munich i wakken ad εawdent i lexdeε-nsent, asmi ay kfant afus deg beḍḍu n Kosovo γef Serbya, dγa s waya, sskanayent-aγ-d amek ur lmident acemma seg wass-nni ar ass-a.      

 

 

Obama yezzem-d, daγen, deg tmura ay yettwalin « asseqdec n yiγil aserdasi (force militaire) yezmer ad yili yelha am wakken ay yezmer ad yili dyiri-t », yerna timura-a ttawḍent ula i wakken ad cikkent deg « Marikan akked nneyyat-nnes, imi d nettat ay d tanezmart (puissance) tameqrant tawḥidt deg umaḍal ». D awal-a yenna-t-id, Obama s tfenṭazit akked s ucuffu, war ma ixemmem γef tidet n tsertit tamarikanit tabeṛṛanit ama deg yiseggasen ineggura, ama deg wayen yezrin zik. Dγa, γef leḥsab n tmuγli n « tnezmart taserdasit (puissance militaire) tawḥidt » deg umaḍal, Axxam Amellal ed Pentagon werjin zemren ad ccḍen. Akk ayen ay d-ttinin d tidet, ur yecciḍ cwiṭ wala aṭas.   

 

 

Lemmer ad d-afen wiyaḍ kra n tuccḍa deg wayen ay tetteg tnezmart taserdasit (puissance militaire) tawḥidt [Iwunak Yeddukklen], aya yebγa ad d-yini d timuγliwin-nsen timsalwiyin (pacifistes) ay yeccḍen yerna d « akṛah n Marikan » ay ten-id-yessenṭaqen. Dγa, ahat, d aya ay d-yeqsed Obama mi d-yebder « tuggziwin [menaces] ay izemren ad ḍurrent aγref [cceεb] amarikani », imi inaw (discours) n Obama ur d-yebdir tuggziwin niḍen ay aγ-iqennεen ama deg Afγanistan, ama deg tmiwa niḍen n umaḍal.

 

 

D acu kan, taγawsa tameqrant akk umi nger tamawt –yerna tessaged-aγ- deg yinaw (discourse) n Obama nettat mi d-yebder « asteεṛef s umezruy ; amdan ur d-yettwaxleq yekmel yerna ṣ̣ṣ̣wab yesεa tilisa ». Yezmer yiwen ad ixemmem, ma nebder-as-d awalen-a : Obama yebγa ad d-yini ula d Imarikaniyen d imdanen ay izemren ad ccḍen, d acu kan, ayen ay d-yerna akken ad d-yessefhem aya yesskanay-d ur d Imarikaniyen ay d-yeqsed, wanag d wiyaḍ. 

 

 

Lemmer ad inadi yiwen γef kra n uselway amarikani niḍen ay d-yennan awal am wa, ur t-yettaf. Yuγ lḥal, Iwunak Yeddukklen d tamurt ay yettzuxxun s yiman-nnes d nettat ay d tamurt tamezwarut ay d-ilulen s yimenzayen (principes) n Lqern wis 18 n Tafat ed yimenzayen n lqern wis 17 n Tallit n Ṣ̣ṣ̣wab. Dγa, mi ara nwali aselway amarikani yettini-d amdan ur d-yettwaxleq yekmel yerna tuccḍa ed ḍḍeεfan d tiγawsiwin yellan deg ugama-nnes (nature), aya yessagad-aγ. Yuγ lḥal, s wawal-a, Obama yeldey-aγ tawwurt i wakken ad neqbel tuccḍiwin yeffγen i ṣ̣ṣ̣wab ed wayen yeqqnen akk γer waya, yerna lḥeqq n tidet ala d iγil ay t-id-yessebdaden, yerna tamurt, γas tetteg lxir, ma terra-tt tmara, tezmer ad teg cceṛ.

 

 

Dγa ma yella lεib deg wemdan ay yella, deg-s ay yezdeγ, yes-s ay d-yekker, yerna ameyyez-nnes yezmer ad yili yecceḍ, ihi amdan, akken ay d-yenna Alexander Pope, « ilul-d kan akken ad yemmet, yettxemmim kan akken ad yecceḍ », dγa γef leḥsab n tmuγli-a, amdan, seg wasmi ara d-ilal, yesεa azref ad yeg amgaru (ṭṭrad), yerna imenγiyen umi iḥeddeṛ ur ferrun deg tallit-nni ay deg yedder. Γef leḥsab n Obama, amgaru yennulfa-d seg wasmi ay d-nnulfan yemdanen, yerna skud llan yemdanen, ur ttnusun yemgura. Dγa, γef leḥsab n tmuγli-a n Obama, imgura ed yemdanen ur ttnusun arma d asmi ara faken deg sin yid-sen.

 

Taqcict yettewten s tleffuγin (lbumbat) timarikaniyin deg Afγanistan (taddart n Bala Baluk, tamnaḍt n Farah)

(Taγbalut)

 

 

Ayen yessawḍen Obama, ama s yisem-nnes d imḍebber n Utaram (Lγerb), ama s yisem-nnes d amdan, akken ad d-yesnulfu tamuγli-a taberkant yedda-d daγen deg yinaw-nnes (discours), mi d-yebder kra seg tedyanin timeqranin ay d-yellan sdeffir n Wemgaru Asemmaḍ yerna ssersent llsas i lqern-a amaynut.

 

 

Dγa yenna-d :

 

 

“Umneγ nezmer ad nekf lḥeqq i yiman-nneγ ad nesseqdec iγil γef ljal n ssebbat talsanin (raisons humanitaires), akken ay nga deg Balqan neγ deg yimukan niḍen ay iḥuza wemgaru (ṭṭrad). D acu kan, ma neqqim ur ntteg acemma, lbal-nneγ ur aγ-yetthenni yerna ma nger iman-nneγ sakkin, aya ad aγ-d-yesqam γlay ugar. Γef waya, akk timura timasayin (responsables) yessekf ad steεṛfent s dduṛ ay zemren ad t-uraren yiserdasen ay yesεan lewkala ibanen i lmend n weḥraz n talwit”.  

 

 

Yerna-d :

 

 

“Wid yettamnen s talwit qlil anda ay ssawaḍen γer talwit n tidet. Talwit teḥwaj tamasit (responsabilité). Talwit teḥwaj taγersawt (sacrifice). Dγa γef waya ay yessekf γef Tamsisit Taṭlasit (Alliance Atlantique) ad tkemmel ad tili”.

 

 

Mi d-yessawel Obama γef temsal-a, yebder-d daγen tamurt-nni wuγur d-yusa d inebgi akken ad yawey arraz-nnes, ed uttekki-nnes deg wemgaru n Afγanistan: “42 n tmura ay yeddan yid-neγ –gar-asent Nuṛwij- i wakken ad neεreḍ ad nḥudd iman-nneγ akked wakk timura seg tenṭagin [attaques] niḍen”.

 

 

Obama yessemγer tagnit arma ay yerra uguren d wid yerzan amaḍal s lekmal-nnes. Akk timura n umaḍal terza-tent tuggza (menace), yerna kra seg-sent – 43-nni n tmura ed yecriken yettekkan deg Temsisit Taṭlasit – d tid ay ibedden i wakken ad rrent iεdawen seg tewwurt. Dγa, deg tegnit-a, yewεeṛ fell-aγ ad neg amgerrad gar Usekkud-a (Doctrine) amaynut n Obama ed win n Blair akked Bush. 

 

 

Tuγdaḍt (mission) n Yimarikaniyen d tin nesεi akud, wala amkan, wala ilugan (règles). “Iwunak Yeddukklen n Temrikt ttekkan deg laman n umaḍal deg settin n yiseggasen-a ineggura ama s yidammen n warraw-nsen, ama s ljehd n yemrigen-nsen (leslaḥ) … Yerna aεewwel n Marikan i wakken ad d-tessiγ laman deg umaḍal werjin ad yefcel. D acu kan, deg umaḍal ay deg tuggziwin (menaces) zerεent deg yal amkan, yerna tuγdaḍin qqlent weεrent ugar, Marikan ur tezmir ad teqdec i yiman-nnes kan. Marikan ur tezmir ad teḍmen talwit i yiman-nnes kan.  Aya d tidet deg Afγanistan. Aya d tidet deg Yiwunak imezgulen (Etats rates) am Ṣ̣umalya …Yerna nesḥissif imi tidet-a mazal ad tkemmel d iseggasen deg tmiwa ur nerkid”. 

 

 

“Imḍebbren ed yiserdasen n tmura n Temsisit Taṭlasit (Alliance Atlantique), ed yimeddukal ed yemsisan (alliés) niḍen, sskanayen-d tidet-a s tezmert ed tebγest (lkuṛaj) ay d-sseknen deg Afγanistan”.

 

 

Aselway n Yiwunak Yeddukklen yebder-d ismawen n tmura niḍen yellan d tuggza (menace) ay izemren ad tḍurr Marikan, azalen-nnes, imsisan-nnes (alliés) ed umaḍal s lekmal-nnes, dγa sennig Afγanistan ed Ṣ̣umalya, Obama yerna yebder-d Iṛan, Myanmaṛ (Birmanya), Kurya n Ugafa, Sudan ed Zimbabwe. Kra seg xemsa-a n tmura yebder-itent-id George W. Bush deg wumuγ-nnes (liste) n tmura “ay yettεawanen taremmiγt [rrebrab]” sdeffir n 11 Ctembeṛ, ma d kra, tebder-itent-id Condoleezza Rice sdeffir-s, asmi ay d-tessawel γef “leεcuc n lbaṭel”, ma kra seg-sent ttekkant ama deg tmura ay d-yebder Bush, ama deg tid ay d-tebder Rice.

 

 

Tisertiyin n Bush ay d-yellan deg tallit-nni ay d-iḍefren 11 Ctembeṛ 2001 nella nessaram ad fakent mi ara tfak teswiεt-nni, d acu kan, γef wakken nettwali, Obama yessefray ad tent-ikemmel. Amgaru-nni (ṭṭrad) ay d-yettilin deg wenẓul (sud) n Asya [deg Pakistan ed Afγanistan] yettnerni s tazzla yerna aya yesskanay-aγ-d s tidet lebγi n Obama i wakken ad yeḍfer ljeṛṛa n uselway-nni ay t-yezwaren. Yuγ lḥal, deg tegnit-a, amgaru ur yelli d tuffγa kan γef leεwayed, wanag d llsas n tsertit taγelnawt (politique nationale) s lekmal-nnes.

 

 

Deg wungal-nnes (roman) “La Bête humaine » (Aγersiw alsan), Emile Zola iquren agdud afṛensis ay ifeṛḥen s yiwen n wemgaru (ṭṭrad) ay d-yellan deg Prusya yerna yekfa axeṣ̣ṣ̣ar i tmurt (“A Berlin!”) ed yiwet n tmacint ay yettazzalen γer sdat s ljehd-nnes war ma tesεa anehhaṛ. Dγa, ula d inaw (discours) n Obama deg Oslo yesskanay-d Marikan mazal-itt tewjed akken ad teẓdem γer sdat ed ad tekcem deg yemgura, γas akken beddlen yinehhaṛen-nnes [imḍebbren]. S waya, nezmer ad d-inin wid-nni yellan ssamaṛen i wakken ad teg Marikan amgaru [deg tallit n Bush], am Robert Gates, James Jones, Richard Holbrooke, David Petraeus ed Stanley McChrystal rewyen lkanun mliḥ, tikkelt-a, i wakken ur ixessi.

 

 

Sγur Rick Rozoff

 

Tasuqilt sγur Omar Mouffok

 

 

Rick Rozoff d ameγnas (militant) yettekkan deg lecγal mgal n wemgaru (ṭṭrad) ed mgal n tgermant (intervention) tamarikanit deg tmura niḍen. Iqeddec ugar n ṛebεin n yiseggasen i lmend n waya. Ass-a, yezdeγ deg Chicago (Illinois, Iwunak Yeddukklen), yerna d netta ay d imḍebber n Stop NATO International.

 

 

Taγbalut: http://www.voltairenet.org/article163261.html

 

 

Γer γer daγen:

 

Inaw n Obama i Yinselmen (Sγur Thierry Meyssan)