Maṣ̣er tbennu aγrab n wuzzal gar-as ed Γezza

Laṛebεa, 9 Dujembeṛ, 2009

Sγur Christian Fraser, BBC News, Lqahira

Maṣ̣er tebda tbennu yiwen n weγrab d ameqran n wuzzal γef tlisa-nnes akked Tesfift n Γezza, imi ay tεerreḍ ad tergel igennariyen-nni [tunnels] ay sseqdacen Yifalesṭiniyen n tama-a akken ad ssukken seg-sen sselεa, γef leḥsab n yisalan ay d-yuwḍen γer BBC.

Asmi ara ifak weγrab-a, ad yili γezzif gar 10 ed 11 n yikilumitren yerna ad yalqay s 18 n lmitrat ddaw tmurt. Γef wakken nesla, Imaṣ̣riyen ad bnun aγrab-a s uεiwen n yijenyuṛen n yigen (armée) amarikani ay d-igan iγawasen (plans) n weγrab-a.

D acu kan, asenfar-a (projet) d win yeqqimen d uffir, imi anabaḍ (lḥukuma) amaṣ̣ ri ur d-yenni kra, ur d-iwekked γef lebni n weγrab-a. Leqdic i lmend n lebni n weγrab-a ad yeṭṭref 18 n wayyuren.

Yuγ lḥal, acḥal n ledwaṛ aya seg wasmi ifellaḥen n tama tamaṣ̣ rit gren tamawt izad leqdic γef tlisa gar Maṣ̣er ed Γezza anda ay ttwagezmen, yagi, aṭas n yisekla (ṭṭjur). D acu kan, cwiṭ kan seg-sen ay yeẓran d aγrab ara yettwabnun.

D aγrab « ur t-ittekk yiwen »

Aγrab-a, γef wakken d-nnan, ur izemmer yiwen ad t-yekk imi ay yemmug s wenfed (acier) ijehden aṭas yerna d alqayan ddaw tmurt.

Γer leḥsab n yisalan ay d-yuwḍen BBC, ifeggagen n weγrab-a gan-ten-id deg Yiwunak Yeddukklen, yerna aγrab-nni ay yettwabnu s tserrusi n yifeggagen-a ay yettuṛekkaben am tceqqufin n weεban (mosaïque). Nnig way-a, ifeggagen-a ttwaεerḍen i wakken ad ẓren ma zemren i uṭṭerḍeq n tleffuγin (lbumbat).

Γas akken, imḍebbren imarikaniyen ay netter nekṛen attekki n Yiwunak Yeddukklen deg lebni neγ deg ussenzi n ttawil ay yes ara yettwabnu weγrab-a.

Lεid Tameqrant γer Yifalesṭiniyen:

assukku n wakraren ttekken-d seg yigennariyen

Γef leḥsab n yisalan ay aγ-d-yuwḍen, anfed (acier) n weγrab-a ur yezmir ad yettwagzem wala ad yefsi – anamek-nnes ur yezmir yiwen ad t-yeflu. Kra n teγbula (sources) iqerben γer yimeẓla n wumel (services de renseignements) n Maṣ̣er nnant-d aγrab-a la yettwabnay sdat n weγrab-nni [n yexmir –abiṭun-] yellan yagi, am wakken ay d-nnant ttwabnan yagi 4 n yikilumitren seg weγrab-a deg ugafa (nord) n tenqiḍt n wezgar n Ṛafaḥ [tanqiḍt n unekcum gar Maṣ̣er ed Γezza], ma d imir-a, yebda-d leqdic n ukemmel n weγrab-a γer wenẓul (sud).

Yuγ lḥal, akal yellan seddaw tliwa gar Maṣ̣er ed Γezza yeccuṛ d imerjan ed yigennariyen (tunnels), d wid ay sseqdacen Yifalesṭiniyen akken ad d-ssukken akk ayen ḥwajen deg tudert-nsen n yal ass, imi Isṛayil tḥettem-d fell-asen targult (blocus) ay ten-iḥeṛṛmen seg kullec.

Aγrab yellan yagi gar Γezza ed Maṣ̣er ad as-d-rnun Yimaṣ̣riyen aγrab niḍen ddaw tmurt

i lmend n ussejhed n wexnaq n Yifalesṭiniyen

Maca Isṛayiliyen nnan-d igennariyen-a (tunnels) ttusseqdacen daγen Yifalesṭiniyen akken ad d-ssukken imdanen, imrigen (leslaḥat) ed yifarisen (produits) ara sqedcen akken ad d-gen timeẓdiyin-nni (roquettes) ay yes kkaten timdinin n wenẓul (sud) n Isṛayil.

Deg tidet, ur yelli lettkal i wakken aγrab-a ad yeḥbes assetti (trafic) gar Maṣ̣ er ed Γezza, d acu kan, ad iḥettem Ifalesṭiniyen akken ad γzen igennariyen (tunnels) d ilqayanen ugar am wakken ara yergel igennariyen-nni ay iqerben γer tjumma (surface), d wid ay sseqdacen Yifalesṭiniyen akken ad d-awyen amur ameqran seg sselεa ay ḥwajen deg tudert-nsen.

Sγur Christian Fraser

Tasuqilt : Omar Mouffok

Taγbalut : http://news.bbc.co.uk/2/hi/middle_east/8405020.stm