Ccinwa: Dduṛ n Lalman deg ccwal ay inekren deg Xinjiang

Sγur German-foreign-policy.com (07 Yulyu 2009)

Berlin tesseqdac tiγewwaγin (émeutes) ay d-inekren deg tama n Xinjiang (deg utaram [lγerb] n Ccinwa) i wakk-n ad cemmet s teqseḥ adabu acinwat.

Claudia Roth, taselwayt n Ukabar Azegzaw, tessutter seg Tegduda Taγerfant n Ccinwa ad d-tebdu ”tisestanin (enquêtes) s tazzla yerna war ccerḍ” i wakk-n ad d-iban way-n yeḍren deg taluft-a ay deg uzzlen waṭas n yidammen. Ttawilat n yisalan imeqranen deg Lalman nnan-d tasertit n tdersiyin (politique des minorités) ay teḍfer Ccinwa ”texṣ̣er”, yerna nnan-d Ccinwa tezmer ”ad teṭṭerḍeq”. Imessebḍa (séparatistes) iwiguren [imezdaγen inselmen n Xinjiang] d nitni ay d-yebdan tiγewwaγin-a deg tgara n yimalas (dduṛt) yezrin, dγa snekren-d timeskanin (timesbaniyin) ay deg gan ifadden i medden ad rẓen ed ad sserγen ayla n Yicinwaten Ihanen, yerna imessebḍa-a d iseggasen ay-a seg wasmi ay sεan assaγen ijehden akked Lalman. Agensas-nsen (représentant) deg Lalman netta d Aswir Amaḍlan Awigur (Congrès Mondial Ouighour), yezga-d deg Munich, yerna iqeddec i wakk-n ad d-yerbeḥ

lemεawna n tmura tutrimin (tiγerbiyin) i lmend n beḍḍu n Yiwuguren γef Ccinwa.

Aswir-a, deg wegraw-nnes amatu (assemblée générale) ay iga deg Mayyu, deg Washington, yessewjed-d isurifen ara yeg seg-a γer sdat. Seg tama niḍen, ula d aγlif almani n tγawsiwin n beṛṛa yettakf-as-d tameẓẓuγt i Weswir Amaḍlan Awigur, yerna, sdeffir ma llant-d tγewwaγin-nni, Aswir-a iger-d tiγri i wakk-n ad d-ilint tmeskanin (timesbaniyin) mgal Ccinwa. Γef leḥsab n yisalan icinwaten, d Aswir Amaḍlan Awigur ay ibedden deffir n ccwal-nni ay inekren deg Xinjiang deg tgara n yimalas yezrin.

Ma cwiṭṭ, 150 n yemdanen ay yemmuten deg tγewwaγin-nni (émeutes) ay inekren deg Urumqi, tamaneγt n Tama Tafulmant (autonome) Tawigurt n Xinjiang. Yuγ lḥal, aṭas ay-a seg wasmi ara ttimγuren wuguren deg tama-a. Imessebḍa (séparatistes) Iwiguren ssefrayen ad gen timeskanin (timesbaniyin) deg Ctembeṛ mgal n umulli (anniversaire) wis 60 n uεiwed n unekcum n Xinjiang γer Ccinwa. Iwiguren d aγref (cceεb) yessawalen yiwen n yiles yeqqnen γer twacult n yilsawen iteṛkiyen, yerna d inselmen ay yeddren deg Xinjiang. Kra seg-sen qeddcen i wakk-n ad sdukklen Xinjiang (umi γγaren ”Turkistan Tagmuḍant [tacerqit]”) akked tmura niḍen n Asya Talemmast ay yessawalen ilsawen iteṛkiyen, yerna ttwalin, i wakk-n ad d-yili way-a, yessekf ad bḍun tamurt-nsen γef Ccinwa.

Uguren, deg Xinjiang, rnan imγuren deg tgara n Yunyu, mi mmuten sin n Yiwiguren deg ccwal ay inekren gar Yiwiguren ed Yicinwaten deg wenẓul (sud) n Ccinwa. Dγa deg tgara n yimalas yezrin, Iwiguren bdan ttruẓun ayla n Yicinwaten, sserγayen tikeṛwas ed ttemmγen γef yal amdan ur nelli d Awigur, s tdebbuzin, s yeẓra neγ s tferyin (lemwas), maca werεad neẓri anect n Yiwiguren yemmuten s ufus n yiγallen n laman, wala anect n yemdanen niḍen ay yemmuten deg ccwal-a.

Tifrat

Aswir Amaḍlan Awigur, ay d-yezgan deg Munich, irennu zzit i tmes yerna yezmer lḥal ad yili d netta ay d-igren tiγri, deg yimalas yezrin, i wakk-n ad d-yenker ccwal gar Yiwiguren ed Yicinwaten ihanen.  D tuddsa-a (organisation) ay d timḍebbert n Yiwiguren ay yeddren deg lγerba deg tmura n Utaram (lγerb), yerna agraw-nnes amatu (assemblée générale) wis tlata yella-d deg Mayyu, deg Washington. Deg wussan-nni daγen, Aswir Amaḍlan Awigur, s wemεiwen akked National Endowment for Democracy (NED), iga-d ”asarag (conférence) γef yizerfan n wemdan” ay γef d-ssawlen s uḥettet γef ”tifrat yerzan Turkistan Agmuḍan (acerqi) n uzekka”. Gar wid ay d-igan isaragen deg temlilit-a, yella-d ula d yiwen n ugensas (représentant) seg Tiddukkla Talmanit n Yiγerfan Yettwaggzen ([peuples menacés], s talmanit: Gesellschaft für bedrohte Völker – GfbV), am wakk-n ay ttekkan daγen kra n yimaslaḍen (membres) seg Congress amarikani [1], yerna d ay-a ay asen-igan ifadden i yimessebḍa (séparatistes) iwiguren. 

Sakk-in, deg tezwara n Yulyu, Aswir Amaḍlan Awigur iger-d tiγri akk-n ad d-ilint tmeskanin (timesbaniyin) sdat n tmuhal (ambassades) ticinwatin deg tmura n umaḍal, γef ljal n tmattant n sin n Yiwiguren deg yiwet n taluft ay d-yellan deg Yunyu, deg wenẓul (sud) n Ccinwa. Γef leḥsab n tnegga (agence) n yisalan tacinwat Xinhua, tiγri-nni ay d-gren i lmend n tmeskanin teḍfer-itt-id teγri niḍen deg Internet ay d-yennan yessekf γef medden ”ad sεun tabγest (lkuṛaj)” yerna ad ”gen taγawsa tameqrant” – wi d imeslayen ay izemren ad ttwafehmen d assemεen i ussenker n ccwal deg Xinjiang. [2]

D netta ay yezwaren i ṣ̣ṣ̣ef

D timerwin (dizaines) n yiseggasen ay-a seg wasmi Aswir Amaḍlan Awigur yesfayday-d seg wemεiwen yellan gar Lalman akked Yiwunak Yeddukklen deg leqdic-nsen mgal n Ccinwa. Yiwen seg wid ay d-yesbedden tuddsa-a (organisation) d Erkin Alptekin, d amessebḍu (séparatiste) mechuṛen, yerna tawacult-nnes ttqadaren-tt mliḥ Yiwuguren. Alptekin yedda γer Munich deg 1971, yerna yeqqel, deg-in, d ”aneṣ̣ṣ̣aḥ ameqran n tsertit” i lmend n unemhal (directeur) n ”Radio Liberty” tamarikanit. Deg tallit-nni, daγen, ay tebda CIA tetteg inermisen (contacts) akked Yiwiguren ara yettnadin ad bḍun tamurt-nsen γef Ccinwa.

”Kra seg-sen, am Erkin Alptekin, ay iqedcen deg Radio Liberty n CIA, llan, deg lweqt-nni daγen, seg yimezwura ay yeddan ed umussu (mouvement) amessebḍu” ay d-yura usellaḍ (analyste) B. Raman, ay yellan d amaru n teγlamt (secrétaire de cabinet) n unabaḍ (lḥukuma) ahendi [3]. Sakk-in, Alptekin yessebded-d ”Aswir Amaḍlan Awigur” deg Yebrir 2004 (yezga-d deg Munich), yerna yeqqel d aselway-nnes. Γef leḥsab n Beijing, Aswir-a yesεa assaγen (liens) akked trebbaε tiremmaγin (tirebrabin). [4]

Aγlif almani n tγawsiwin n beṛṛa

Sakk-in, d Rebiya Kadeer ay yeqqlen d taselwat n Weswir-a, deg wemkan n Alptekin. Kadeer, deg tgara  n yiseggasen n 1990, tella d nettat ay d tameṭṭut n yiweẓla (femme d’affaires) tameṛkantit akk deg Ccinwa, yerna seg 2005 ay tedder deg lγerba. Deg Nwembeṛ 2006 ay tettwafren d taselwayt n Weswir Amaḍlan Awigur –deg Munich-, yerna i lmend n way-nni, Kadeer terza-d i tikkelt tamezwarut γef Berlin. Aseggas sakk-in, Kadeer temlal ed yigensasen (représentants) n tsebdadin (fondations) ay yeqqnen γer yikabaren almaniyen, am wakk-n ay temlal daγen ed Useqqamu n Yizerfan n Wemdan n Unabaḍ (lḥukuma) Almani, yerna tessawel ula akked weγlif almani n tγawsiwin n beṛṛa [5]. Utrimen (iγerbiyen) ttcebbiḥen tugna (image) n tmeṭṭut-a akk-n ad teqqel d azamul (symbole) n wassaγen izuyaz (relations publiques) n Yiwiguren, am Dalai Lama ara d-yeggaren tiγri i medden akk-n ad εiwnen imessebḍa (séparatistes) n Tibet.

Rebiya Kadeer deg temlilit-nnes ed George Bush deg 2008

Rebiya Kadeer (umi semman ”Yemma-s n Yiwiguren”) ssumren-tt-id (proposer) yagi acḥal n tikkal akk-n ad tawey Arraz n Nobel n Talwit. Deg Usarag n Tγemsa Aγelnaw Almani, γran-d tameddurt-nnes, dγa d ay-a ay tt-yejjan ad tettwassen γer ttawilat n yisalan almaniyen deg wussan-nni.

Tlata n yiγerfan*

*ccuεub

Ttawilat n yisalan n Lalman gren-d tamawt tama n Xinjiang, anda ay zemren ad d-snekren yimessebḍa (séparatistes) ccwal, d tama ay yesεan azal ameqran γer Ccinwa. Tama-a d tiqenṭert ay tesεa Ccinwa akk-n ad taweḍ γer Asya Talemmast yerna akal-nnes d ameṛkanti, yeccuṛ d tiγbula (ressources). Llan wid yettxemmimen yella waṭas n upitṛul ed lgaz deg Xinjiang, yerna nezmer daγen ad naf deg-in ureγ akked wuṛanyum. D acu kan, imessebḍa (séparatistes) iwiguren ur qeddcen i yiman-nsen kan. Nnig n yinermisen (contacts) ay sεan akked yinabaḍen utrimen (lḥukumat tiγerbiyin), imessebḍa-a sεan daγen inermisen akk-n yimessebḍa n tama n Tibet ed wid n Mungulya Tagensit (intérieure). ”Iγerfan-nneγ (ccuεub) yecrek-iten wakal, amezruy akked tuṭṭfa (occupation) tacinwat ay d-yellan tagara-a”, ay d-yenna Dalai Lama deg tgara n yiseggasen n 1990. ”Nekk ttwaliγ assirem n yiγerfan n Turkistan Tagmuḍant, Mungulya Tagensit akked Tibet ur yettεeḍḍil ad yeqqel d tidet”. [6]

Berlin teldey tawwurt i yimessebḍa (séparatistes) iwiguren imi ay tessaram ad tessiweḍ taxṣ̣imt-nnes, Ccinwa, ad tesṛuḥ imuren imeqranen seg wakal-nnes, seg Tibet arma d Xinjiang akked Mungulya Tagensit, yerna ay-a akk i lmend n ussefcel n Ccinwa.

Taγbalut: http://www.german-foreign-policy.com/en/fulltext/56262

[1] Conference to Celebrate Uyghur Week; www.unpo.org 18.05.2009

[2] Civilians and armed police officer killed in NW China violence; Xinhua 06.07.2009

[3] B. Raman: US and Terrorism in Xinjiang; South Asia Analysis Group, Paper No. 499, 24.07.2002

[4] China Seeks Int'l Support In Counter-Terrorism; People's Daily Online 16.12.2003

[5] Mmuqel Strategies of Attrition (IV) (http://www.german-foreign-policy.com/en/fulltext/56104)

[6] B. Raman: US and Terrorism in Xinjiang; South Asia Analysis Group, Paper No. 499, 24.07.2002

Tasuqilt: Omar Mouffok

Γer daγen:

Ccinwa ed Wutrimen : Tikli n ussefcel