Amgaru n Obama γef Pakistan 

 

 

Sγur Webster G. Tarpley

 

 

Obama yenna-t-id war ma yenneḍ awal deg yinaw-nnes (discours) ay d-yeγra deg West Point: iεewwel i wakken ad yesseqdec annerni n ccwal deg Wemgaru (ṭṭrad) n Afγanistan i wakken ad d-yaf ssebba ad yesnerni ccwal deg Wemgaru n Pakistan. Seg wasmi ay yeqqel d aselway, yesnerna asseqdec n yedṛunen (drones) yerna aya yegla-d s unnerni n yixeṣ̣ṣ̣aren ay ttgen yemrigen-a (leslaḥat) deg ugafa (nord) n Pakistan, nnig waya, yella daγen lḥeṛs γef Obama i wakken ad yesnerni lecγal n yiserdasen imarikaniyen deg tmurt-a ed ad ḥazen ula d tama n Balucistan. Γef leḥsab n Webster G. Tarpley, iswi ay yezwaren akk γer Obama deg Wurar-nnes ameqran deg tama-a netta d beḍḍu n wakal n Afγanistan ed Pakistan, dγa γef waya ay iqeddec i wakken ad d-yessenker tirebbaε titniyin (groupes ethniques) n kra n tmiwa, ama seg yidis afγani neγ apakistani, i wakken ad yessiweḍ γer yeswi-nnes.  

 

 

15 Dujembeṛ 2009

 

Seg WashingtonD.C. (Iwunak Yeddukklen)

 

 

Inaw (discours) ay d-yeγra Obama deg West Point deg wass n 1 Dujembeṛ 2009 d win ay deg d-yebder annerni n ccwal deg Afγanistan, d acu kan, llan wid ay t-iwalan d asseγret n wemgaru (declaration de guerre) ibanen n Yiwunak Yeddukklen γef Pakistan. Wa d amgaru n ṣ̣ṣ̣enf amaynut, d amgaru ameqran ugar ay deg Iwunak Yeddukklen ttḥakaṛen Pakistan yellan d tamurt n 160 n yimelyunen n yimezdaγen yerna tesεa imrigen aγsiyen (armes nucléaires). Deg wemgaru-a, Imarikaniyen ssefrayen daγen ad bḍun akal n Afγanistan d iḥricen. Dγa, wa ur yelli d amgaru-nni n Afγanistan ay d-bdan Bush akked Cheney, wanag d amgaru ameqran ugar ay deg Imarikaniyen bγan ad εerḍen ad sseγlin anabaḍ (lḥukuma) n Pakistan deg Islamabad yerna ad sγerqen tamurt-a deg wemgaru aγarim (guerre civile) ara tt-yerwin akk, akken ay teḍra i tmura n Balqan ay yeftutsen. Abrid ay fernen Yimarikaniyen i lmend n waya netta d assekcem n ccwal-nni yellan deg Afγanistan γer Pakistan, ed beḍḍu n wakal n Pakistan γef leḥsab n titniyin (ethnies) ay tt-izedγen.

 

 

Wa d amgaru arusrid (indirect) ay deg Imarikaniyen bγan ad sqedcen ttawilat n tsuta (génération) tis ṛebεa [leslaḥat imaynuten am yeḍrunen] ed ttekniyin n temgarut (techniques de guérilla) i wakken ad mmγen γef Pakistan, imi tamurt-a ur zmiren Yiwunak Yeddukklen ed yimeddukkal-nsen ed nnaγen yid-s srid (directement), imi ay εyan, yagi [seg yemgura n Lεiraq ed Afγanistan]. Deg wemgaru-a, Iwunak Yeddukklen εezmen ad sqedcen Ṭaliban d iwkilen-nsen n ccwal, yerna Obama, mi ara yemmeγ γef Pakistan, yessaram ad d-iḥelli nnfeε n Yiwunak Yeddukklen ama deg Asya Talemmast, ama deg Uṛasya (Eurasie) s umata.

 

 

Iwunak Yeddukklen ur bγin amgaru usrid*

 

*guerre directe

 

 

Amgaru aγarim (guerre civile) ay d-yettilin, ass-a, deg Afγanistan ufan-tt-id Yimarikaniyen d ssebba kan i wakken ad d-bdun lḥemla tameqrant n ccwal deg wakk timura ay d-yezzin γef tama-a, γas ur bγin ad d-inin aya s lejheṛ.  Lemmer aya yeḍra deg wussan-nni ay deg Bush ed Cheney llan ttemmγen, war ṛṛeḥma, γef tmura niḍen, tili ad d-afen ssebba i wakken ad wten Pakistan srid (directement). D acu kan, Pakistan d tamurt tameqrant aṭas yerna Iwunak Yeddukklen, ass-a, ḍeεfen aṭas yerna ur sεin idrimen ara ten-id-ikafin i wakken ad gen aya. Nnig waya, Pakistan tesεa imrigen aγrisyen (armes nucléaires) ed tmeẓdiyin tilemmasin n wezrag (missiles à moyenne portée) ay yes tezmer ad ten-twet. Dγa ass-a, Pakistan tesεa ljehd ara tt-id-ikafin i wakken ad terẓ ifadden i Yimarikaniyen akken ad tt-wten srid. Iwunak Yeddukklen ur zmiren ad aznen iserdasen ara iẓedmen γef Pakistan, am wakken ur zmiren ad bnun isaduren ignawiyen (bases aériennes) sdat Pakistan, imi tamurt-a tesεa imrigen aγsiyen ay yes ara ten-terẓ. Dγa, seg tama-a, nezmer ad d-nini leqdic n Ali Bhutto ed A.Q. Khan i wakken ad rren Pakistan d tamurt ijehden d ayen yeffγen γer tafat.

 

 

D acu kan, Iwunak Yeddukklen ttnadin ad d-afen amek ara wten Pakistan war ma uwḍen γer usseqdec n yemrigen aγsiyen (armes nucléaires), bitt war ma uwḍen ula γer usseqdec n yemrigen n menwala. Dγa γef waya ay bγan ad skecmen ccwal yellan deg Afγanistan γer Pakistan.

 

 

Win ay yessulin leḥsab i lmend n ussenker n wemgaru-a aγarim (guerre civile) amaynut deg Pakistan netta d Ajiniṛal n Yiγallen Usligen (Forces Spéciales) Imarikaniyen, Stanley McChrystal. Argaz-a yettwassnen yagi s ussebded n uẓeḍḍa (réseau) n texxamin n uεetteb deg Lεiraq, yerna ayen yejjan Imarikaniyen ad t-sqedcen deg ussenker n ccwal deg Pakistan netta d tarmit-nnes (ttejṛiba) deg Lεiraq. Yuγ lḥal, McChrystal, i wakken ad yessefcel Iεiraqiyen, yessenker-d deg tmurt-a amgaru aγarim gar Yisunniyen ed Yiciεiyen s wesnulfu n terbaεt “Al-Qaεida deg Lεiraq”, d tarbaεt yellan seddaw leḥkem n Zarqawi [ay yellan d ameggi (agent) n Yimarikaniyen]. Lemmer d ay ddukklen akk Yiεiraqiyen mgal Imarikaniyen, tili ineggura-a ad ttwaẓẓεen seg tmurt. D acu kan, asmi ay d-snulfan Yimarikaniyen tarbaεt n “Al-Qaεida deg Lεiraq”, qqlen wayt terbaεt-a neγγen Iciεiyen, dγa d aya ay yejjan ineggura-a ad nγen Isunniyen seg rrif akken ad d-rren ttaṛ, yerna d aya ay d-yesnekren amgaru aγarim deg Lεiraq.

 

 

Titaktiyin-a (tactiques) d tid ay d-yettwajebden seg leqdic n Ujiniṛal abriṭani Frank Kitson ay d-yuran fell-asent deg wedlis-nnes “Low Intensity Operations (Timehlin Timecṭuḥin n Tedwast)”. S waya, nezmer ad d-nini Ajiniṛal McChrystal d amtil amarikani n Heinrich Himmler n yiserdasen n SS n Hitler, yerna d Obama ay t-id-ifernen γef tmussni-nnes. Ma d win iḥekmen McChrystal, Ajiniṛal Petraeus, yebγa ad yeqqel d Feldmarschall von Hindenburg – meḥsub, yebγa ad yeqqel d Aselway ay d-itteddun n Yiwunak Yeddukklen.

 

 

Iwunak Yeddukklen ed yecriken-nnes n Temsisit Taṭlasit (Alliance Atlantique) bγan ad faṛsen seg tenqiḍin n ḍḍeεfan n Pakistan, yerna ur nezmir ad nefhem aya war ma nesseqdec tagertilt (carte) n tegrawin titniyin (groupes ethniques) n Afγanistan, Pakistan, Iṛan ed Lhend. Amur ameqran seg tgertilin sskanayent-d kan tilisa tisertiyin (frontières politiques), d acu kan, tilisa-a nnulfant-d deg tallit n temnukda (impérialisme) tabriṭanit yerna ur nezmir ad nessen yes-sent anda-tent tegrawin titniyin timeqranin n tama-a. D acu kan, i wakken ad nefhem ugur-a, yessekf ad d-nebder ismawen n kra n tegrawin neγ n yiγerfan (ccuεub). Tamezwarut, d Ipactunen, amur ameqran seg-sen zedγen deg Afγanistan, d acu kan, sεan amur d ameqran daγen deg Pakistan. Ibaluciyen d aγref ay izedγen deg Pakistan ed Iṛan. Ma d Ipenjabiyen ed Yisindiyen zedγen deg Pakistan. Tawacult n Bhutto laṣ̣el-nnes seg tama n Sind.

 

Tagertilt ay d-yemmalen titniyiyin timeqranin yeddren gar Iṛan, Pakistan ed Afγanistan 

 

 

Pactunistan                   

 

 

Tikli n Yiwunak Yeddukklen ed Temsisit Taṭlasit (Alliance Atlantique) tebda-d s Yipactunen. Amur ameqran seg wid yettekkan deg terbaεt n Ṭaliban d Ipactunen yerna Ipactunen d yiwet seg tegrawin titniyin (groupes ethniques) timeqranin akk deg Afγanistan. Γas akken, ass-a, anabaḍ (lḥukuma) n Kabul n uselway Hamid Karzai (itteddun s ṛṛay n Yimarikaniyen) yeεzel-iten seg udabu, yili netta s timmad-nnes d Apactun. S waya, Ipactunen ur ttekkan deg Yigen Aγelnaw (Armée Nationale) n Afγanistan ay d-snulfan Yiwunak Yeddukklen deg 2001. Tafekka n yifesyanen (corps des officiers) n yigen-a d win ay ṭṭfen Yitajiken yellan zik deg Temsisit n Ugafa (Alliance du Nord) yeddukklen ed Yimarikaniyen akked ad nnaγen mgal Ipactunen n Ṭaliban. Itajikiyen ssawalen s tdarit, d iles umi γγaren daγen “tafarsit tagmuḍant (tacerqit)”. Ma d ifesyanen niḍen n yigen afγani laṣ̣el-nsen seg Yihazaraten, yellan d aγref (cceεb) niḍen n Afγanistan. Dγa s waya, Ipactunen ttwaεezlen seg yinurar yesεan azal deg tmurt.

 

 

Tikli n Yiwunak Yeddukklen nezmer ad tt-nefhem ladγa mi ara nẓer amek iγallen-nsen ḥeṛṛsen, ttcewwilen, meḥḥqen yerna neγγen Ipactunen deg Afγanistan, am wakken ay ttgen ifadden i yiγerfan (ccuεub) niḍen n tmurt-a akken ad mseεdawen yid-sen. Nnig waya, Obama yessutter ad ttwaznen 40.000 n yiserdasen imarikaniyen ed yiserdasen n Temsisit Taṭlasit (Alliance Atlantique) imaynuten γer Afγanistan,  yerna amur ameqran seg-sen ad ten-ssersen deg temnaḍt (province) n Helmand ed tmiwa niḍen ay deg amur ameqran seg yimezdaγen d Ipactunen. Yerna aya ad d-yeglu kan s wesnerni n cceḥna ed wemseεdaw n Yipactunen akked Kabul ed yiγallen ibeṛṛaniyen ay yeṭṭfen tamurt, yerna aṭas seg yemjihad-nsen imaynuten ara izegren tilisa γer Pakistan ay deg ara nnaγen, daγen, akked unabaḍ (lḥukuma) n Islamabad. Sdat n wugur am wa, Imarikaniyen ad snernin aεiwen-nsen i yimasiwen n wemgaru (seigneurs de la guerre) ed yemḍebbren n trebbaε n ussetti n tehyufin (traffic de drogue) i wakken ur ttajjan Ipactunen ad rebḥen imenγi deg wakk timiwa n tmurt.

 

 

Ula seg yidis apakistani, Ipactunen ttwaεezlen seg unabaḍ (lḥukuma). Yuγ lḥal, Ipactunen ttwalin Islamabad ed yigen (armée) apakistani d ayla ay ṭṭfen Yipenjabiyen ed kra n Yisindiyen. Seg yidis apakistani n wakal n Yipactunen, Imarikaniyen ttaznen isafagen war anehhaṛ [avions sans pilote], wid-nni umi γγaren “idṛunen”, akken ad nγen medden seg rrif, am wakken ay ttaznen imeggiyen (agents) n CIA ed yimesḍasen (tireurs ḍélite) n Blackwater i wakken ad nγen kra n yemdanen, yerna kra n yisalan nnan-d Imarikaniyen qqlen ttazznen ula d wid ara igen tinegzarin tiremmaγin (massacres terroristes). Yuγ lḥal, seg melmi kan, llant-d tnegzarin (massacres) deg temdint n Peshawar, yerna γef leḥsab n Ṭaliban n Pakistan, d imeggiyen (agents) n tkebbanit n Blackwater (ay iqeddcen i lmend n CIA) ay igan tanegzart-a. Lecγal am wi ur tezmir tmurt yesεan lḥeṛma ad ten-teqbel yerna sseγlayen s wazal n tmurt am ta. Yal tikkelt ay deg ara ttewtwen Yipactunen, ineggura-a ttinin-d d Ipenjabiyen n Islamabad ay yekfan fell-asen afus imi ay msefhamen ed Yimarikaniyen akken ad ttewten. S waya, iswi amezwaru akk n Obama deg wesnerni n ccwal deg Afγanistan ed Pakistan netta d assenker n Yipactunen i wakken ad d-gen tamurt i yiman-nsen, yemsebḍan γef snat-a n tmura, yerna d tin ara ḥekmen Ṭaliban. Yuγ lḥal, ma tlul-d tmurt am ta, aya yezmer ad ihudd tadukli taγelnawt (unité nationale) ama deg Afγanistan, ama deg Pakistan.

 

 

 

Balucistan

 

 

Ibaluciyen d aγref (cceεb) niḍen ay yessefray Obama ad t-id-yessenker akken ad d-yeg tamurt i yiman-nnes. Ibaluciyen sεan yagi uguren ed unabaḍ (lḥukuma) n Iṛan, yerna ttwalin anabaḍ-a d Ifarsiyen kan ay t-yeṭṭfen. Yuγ lḥal, Obama yessalay leḥsabat, yagi, i wakken ad yernu ad yazen idṛunen-nni (drones) n CIA (wid-nni umi γγaren Predator) ula γer tama n Balucistan akken ad nγen imdanen ay ttḥakaṛen Yimarikaniyen. Γef leḥsab n yiwen n uṛabul (reportage) n Michael Ware, deg CNN, Iwunak Yeddukklen cikken Osama Ben Laden ed umeddakel-nnes Al-Zawahiri (yellan d ameggi [agent] n MI-6) ad ilin ffren deg temdint n Quetta ay d-yezgan deg tama tapakistanit n Balucistan, yerna ttεawanen, din, imḍebbren n yiwet n terbaεt isem-nnes “Quetta Shura”, yerna aya yezmer ad yeldey tawwurt i Yimarikaniyen akken ad afen ssebba ad gren iman-nsen deg Pakistan. Yuγ lḥal, tirebbaε n tkebbanit n Blackwater ur bεident seg-inna. Ma deg tama tiṛanit n Balucistan, CIA tettεawan tuddsa (organisation) n Jundullah ay yettekkan deg tmenγiwt n medden, yerna, seg melmi kan, Ṭehran tenna-d d tuddsa-a ay igan tanṭagt-nni (attendant) ay d-yellan seg melmi kan yerna tenγa acḥal n yemḍebbren iεlayanen n Yiεessasen n Tegrawla Tiṛanit. Tanekra (révolte) n Balucistan tezmer ad teswaγ tadukli taγelnawt ama n Pakistan, ama n Iṛan, yerna aya ad iεawen Imarikaniyen akken ad rẓen snat-a n tmura ay ttḥakaṛen s tikli-a-nsen.   

 

 

Obama yettḍafar tasuddest* n Rube Goldberg

 

 

*stratégie

 

 

Ula Chris Matthews n MSNBC, yennumen icekkeṛ-d Obama, yenna-d tasuddest (stratégie) tamarikanit, γef leḥsab n yinaw n Obama deg West Point, tcuba mliḥ tasuddest n Rube Goldberg. (Yuγ lḥal, deg tidet, “Al-Qaεida” d igen [armée] n Waεṛaben ed yiremmaγen [irebraben] ay tesseqdac CIA], ma γef leḥsab n tmucuha tunṣ̣ibin [officielles] n Yimarikaniyen, aεdaw-nsen deg tama-a netta d “Al-Qaεida”).

 

 

D acu kan, γas akka Iwunak Yeddukklen bγan ad d-afen ssebba ad nnaγen deg tama-a, imḍebbren-nsen s timmad-nsen nnan-d cwiṭ kan n yimenγan (combattants) n “Al-Qaεida” ay d-yeqqimen deg Afγanistan. Dγa, γef leḥsab n Matthews, ayγer ara aznen Yimarikaniyen ugar n yiserdasen γer Afγanistan ay deg ur d-teggri “Al-Qaεida”, deg lweqt ay deg yessekf ad ten-aznen γer Pakistan, anda ay tezmer ad tili teqqim-d ?

 

 

Yiwen seg yemḍebbren yettwafernen (élus) ay d-iwten deg ṛṛay-a uzlig netta d Asinatur Amegdu (Démocrate) Russ Feingold, seg Wisconsin. Deg yiwet n tdiwennit (interview) deg tilibizyu, Feingold yenna-d “timiwa n Pakistan ay d-yezgan γef tlisa n Afγanistan qqlent, ahat, d ammas (centre) [n tremmiγt tagraγlant –terrorisme international], γas ma yella Al-Qaεida tqeddec deg wakk timiwa n umaḍal, deg Lyaman, deg Ṣ̣umalya, deg Tefriqt n Ugafa, yerna tesεa tirebbaε yeqqnen γer-s ula deg Asya n Wenẓul Agmuḍan (Sud-Est). Ayγer ara nazen 100.000 n yiserdasen neγ ugar γer tmiwa n Afγanistan ur neqrib γer tlisa akked Pakistan ? Iserdasen-a ad ddun γer temnaḍt (province) n Helmand, yerna tama-a tebεed aṭas γef Waziristan [deg Pakistan]. Γef waya, ur fhimeγ swaswa amek tga tsuddest-a (stratégie), ladγa imi ay nettwali Al-Qaεida ur d-yeggri s waṭas deg Afγanistan, yili tella s waṭas deg Pakistan. Γef waya, ur nefhim ayγer ara nazen anect-a akk n yiserdasen γer wemkan ay deg ur llin yemdanen-a [Al-Qaεida], yerna ur d ta ay d tikli ay yessekf ad tt-id-nawey. Ur fhimeγ acemma deg wanect-a”. Yuγ lḥal, “Asinatur Amegdu n Wisconsin yenna-d daγen tasertit tamarikanit deg Afγanistan d tin ay izemren ad tḥettem iremmaγen (irebraben) ed yimeḍḍurfa (extrémistes) ad rewlen γer Pakistan yerna aya ad d-yeglu kan s tmerniwt n ccwal deg tama-a, dγa yenna-d: “Teẓram, ttreγ Iγef n Teγlamt [Chef ḍEtat-major], Amiṛal Mullen, akked Mass Holbrooke, amazun-nneγ (envoyé) γer tama-a, ma yella lemmer ad nazen ugar n yiserdasen γer Afγanistan, aya yezmer ad iḥettem ugar n yimeḍḍurfa akken ad kecmen γer Pakistan” …”Dγa ur iyi-d-nnin ala, yerna dduṛt-a, Gilani, Aneγlaf Amezwaru n Pakistan, yenna-d yugad lemmer ad nazen ugar n yiserdasen γer Afγanistan ad yejj ugar n yimeḍḍurfa ad d-kecmen γer Pakistan. S waya, ttxemmimeγ timerniwt-a n yiserdasen ad d-yeglu s unemgal (contraire) n wayen nebγa, imi aya yezmer ad iḍurr imezdaγen n Afγanistan yerna ad yeg ifadden i Ṭaliban akken ad snernin tadukli-nsen ed Al-Qaεida, yerna d wa ay d anemgal n tsertit-nneγ n laman”. [Feingold: Why Surge Where Al Qaeda Isn’t?, by Sam Stein, Huffington Post, December 6, 2009]

 

 

D acu kan, d ayen ibanen, Iwunak Yeddukklen εemmden deg wanect-a, imi tikli-nsen tamnukdant (impéraliste) tesεa iswan niḍen.  

 

Adṛun (drone) n Predator, d asafag war anehhaṛ (avions sans pilote)

ay sseqdacen Yimarikaniyen akken ad wten tuddar deg Pakistan

 

 

 

Malick: “Obama yesseγret*-d amgaru γef Pakistan ?”

 

 

*déclarer

 

 

Deg yinaw-nnes (discours) ay d-yeγra deg West Point, Obama iga akk ayen yezmer i wakken ur itteg amgerrad gar Afγanistan ed Pakistan, γas akken snat-a n tmura mgerradent, yal yiwet seg-sent tesεa lḥeṛma-nnes yerna deg snat yid-sent ttekkant deg Yeγlanen Yeddukklen (Nations Unies). Tamsalt-a iger-as tamawt Ibrahim Sajid Malick yellan d anemyaru (correspondant) n terga n Samaa TV deg Yiwunak Yeddukklen (yiwet seg tregwa n tilibizyu timeqranin akk deg Pakistan): “Aselway Barack Obama, ay yellan yeqqar-d inaw deg yiwen n wemṛaḥ yeccuṛen d iserdasen imeẓyanen deg Tkadimit Taserdasit n West Point, iban-d amzun yesseγret-d amgaru (declarer la guerre) γef Pakistan. Yal tikkelt ay deg d-yebder isem n Afγanistan, yebder-d yid-s Pakistan … Nekk lliγ qqimeγ γer deffir, d acu kan, frawseγ yerna qrib neggzeγ seg ukersi-nni ay γef qqimeγ mi d-yenna: “tagnit meγγret ugar akked Pakistan, ay yesεan imrigen aγsiyen (armes nucléaires), imi ay neẓra Al-Qaεida ed yimeḍḍurfa niḍen ttnadin yagi imrigen aγsiyen, yerna netḥeqq lemmer ad ten-afen, ad ten-sqedcen”.  Dγa awal-a yessewhem-iyi ladγa imi seg melmi kan, llan-d aṭas n yemḍebbren imarikaniyen ay d-yennan yerna wekkden-d imrigen aγsiyen n Pakistan ttwaḥerzen, ur yezmir weεdaw ad ten-yaweḍ”. [“Did Obama Declare War On Pakistan?”, by Ibrahim Sajid Malick, Pakistan for Pakistanis Blog, 2 December 2009].

 

 

Azwel (titre) n umagrad-a netta ““Did Obama Declare War On Pakistan?” (εni yesseγret-d Obama amgaru γef Pakistan ?), d acu kan, ahat tanqiḍt-nni n tuttra (point ḍinterrogation) nezmer ad tt-id-nessers kan s tin n leḥdaqa, wanag, γef wakken nettwali, akka ay yella lḥal.  

 

 

Deg yiwet n temlilit ed Congress ay deg yettekka Ujiniṛal McChrystal ed wenmagal (ambassadeur) amarikani Eikenberry, uwḍen kra arma ay qqlen beddren-d Afγanistan ed Pakistan s yiwen kan n yisem, “Afpak” neγ “Afpakia”, yerna aya ur yettweεjab.

 

 

Deg unebdu n 2007, Obama, s uεiwen n Zbigniew Brzezinski ed yisenqaden (contrôleurs) niḍen, d netta ay d-ijebden takti-a n usseqdec n yedṛunen (drones) n Predator i lmend n tmenγiwt tasertit (assassinat politique) n yemdanen ay ttḥakaṛen Yimarikaniyen deg Pakistan. Tikli-a n tmenγiwt ssefrayen ad tennerni s tmerniwt n yiγallen imarikaniyen: “Snat n ledwaṛ aya, deg Pakistan, imesḍasen (tireurs ḍélite) n CIA nγan tmanya n yemdanen ay deg yella ccekk ttekkan deg Ṭaliban neγ deg Al-Qaεida, yerna jerḥen sin n yemdanen niḍen deg yiwen n wemkan ay γef d-nnan sseqdacen-t i lmend n wesleγmu (entraînement) n yiremmaγen (irebraben) … Axxam Amellal yekfa ttesriḥ i lmend n wesnerni n usseqdec n yedṛunen deg tmiwa n tewsatin (tribus) n Pakistan yeffγen i lqanun, γef wakken d-nnan yemḍebbren dduṛt yezrin, yerna aya ad yeddu ed teγtast (décision) n uselway … i wakken ad yernu ad yazen 30.000 n yiserdasen γer Afγanistan. Imḍebbren imarikaniyen ttemcawaṛen ed Pakistan i wakken ad wten, i tikkelt tamezwarut, Balucistan – dγa ta d tamsalt ay γef ur msefhamen imi tama-a tezga-d beṛṛa i tmiwa n tewsatin (regions tribales) n Pakistan – imi [γef leḥsab n Yimarikaniyen], ass-a, yella ccekk imḍebbren afγaniyen n Ṭaliban deg tama-a ara ilin ffren”. [“C.I.A. to Expand Use of Drones in Pakistan”, by Scott Shane, New York Times, December 3, 2009. See also “Between the Lines, an Expansion in Pakistan”, by David E. Sanger and Eric Schmitt, New York Times, 1 December 2009].

 

 

Yuγ lḥal, Iwunak Yeddukklen qeddcen, ass-a, i wakken ad d-ssilγen (former) ugar n yinehhaṛen i lmend n tenheṛt n yedṛunen (drones) n Predator.

 

 

Timenγiwt-nni n tsednan ed yigerdan deg Peshawar : ccek deg Blackwater

 

 

CIA, Pentagon ed tkebbaniyin-nni ay ttwekkilen (am tid yessekrayen iserdasen) cikken deg-sen, ass-a, deg uttekki deg tmenγiwt n medden deg tmiwa yemgerraden deg Pakistan, d ccek ay d-yennulfan sdeffir ma llant-d kra n tmenγiwin deg kra n tuddar ed tmeγriwin deg tmiwa ay deg ur d-yelli ccwal deg tmurt-a. Ccek ameqran yella, ladγa, γef tkebbanit n Blackwater [ay yessekrayen iserdasen], tin yeqqlen tqeddec s yisem n Xe Services and Total Intelligence Solutions: “Deg temdint n Karachi, deg Pakistan, yella yiwen n usarud (base) uffir n Tanzaḍt Tucrikt n Temhalt Tusligin (Commande Conjointe des Opérations Spéciales). Deg usadur-a llan yimaslaḍen seg terbaεt n tedγert (élite) n Blackwater, qeddcen, s tuffra, i wakken ad nγen imdanen ay ttḥakaṛen Yimarikaniyen seg Ṭaliban ed Al-Qaεida, timenγiwt n yemdanen yesεan azal ed lecγal niḍen yesεan azal sdaxel ed beṛṛa n Pakistan, γef wakken d-tekcef yiwet n tsestant (enquête) n The Nation. Iqeddacen n Blackwater ttεawanen daγen deg welqaḍ n wumlan (renseignements) yerna ttεawanen iserdasen imarikaniyen deg yiwen n lḥemla tuffirt i usseqdec n yedṛunen (drones) n Predator, d win itteddun ed tiytiwin-nni daγen ay tetteg CIA s ttawilat-a, γef wakken d-yekcef yiwen wemdan yesεan amkan s wazal-nnes deg weḥric n wumel aserdasi (renseignement militaire)”. [“The Secret US War in Pakistan”, by Jeremy Scahill, The Nation, November 23, 2009].

 

 

Γas ma yella aṛabul (reportage) n Scahill yessexlaε, yessekf d-nini ur d-yekcif kullec, imi ur d-yebdir tamsalt-nni ay deg Ipakistaniyen ttehmen Blackwater s uttekki deg umur ameqran seg tberrawin-nni (bombardements) ay d-yettilin deg Peshawar ed temdinin niḍen n Pakistan, akken ay nezmer ad nγer deg yisali-a: “Islamabad, 29 Tubeṛ 2009 [Tanegga n yisalan tacinwat n Xinhua] – Hakimullah Mehsud, imḍebber n umussu n Ṭaliban deg Pakistan, yetthem yiwet n tkebbanit tusligt tamarikanit s uttekki deg tleffuγt-nni (lbumba) yetṭerḍqen deg Peshawar yerna tenγa 108 n medden, γef wakken d-tenna ass n lexmisNNI, tanegga n yisalan n tmurt-a”.  Yuγ lḥal, nezmer ad d-nini, deg tegnit-a, Imarikaniyen sseqdacen taremmiγt (rrebrab) taderγalt i wakken ad nγen anect zemren n medden, ladγa tisednan akked yigerdan.

 

 

Imarikaniyen sγerten-d* amgaru ula γef Uzbikistan ?

 

 

*déclarer

 

 

Γef leḥsab n Scahill, Imarikaniyen ttgen timhal tuffirin (opérations clandestines) ula deg Uzbikistan. Tamurt-a tella, zik, d yiwet seg tegdudyin n Tdukli Tasuvyatit. Ass-a, Uzbikistan tesεa 25 n yimelyunen n yimezdaγen yerna tezga-d γef tlisa n ugafa (nord) n Afγanistan: “Tirebbaε n tkebbanit n Blackwater n Karachi, nnig n uεiwen Tanzaḍt Tucrikt n Temhalt Tusligin (JSOC) ed CIA, ttεawanent, ḍaven JSOC sdaxel n Uzbikistan akken ad nnaγen mgal n Umussu Isenneslem (mouvement islamiste) n tmurt-a, γef wakken d-tekcef yiwet n teγbalut (source) n wumel aserdasi (renseignement militaire). Win ay aγ-d-ikecfen aya yenna-aγ-d: deg tidet, takebbanit n Blackwater ur d nettat ay yettgen timhal-nni, wanag tettekkay kan deg-sen, deg lweqt ay deg, deg wenrar, d iγallen n JSOC ay tent-yettgen. “Aya yejbed-d lwelha-inu yerna yecγeb-iyi imi, ur ẓriγ ma tegrem tamawt, neck werjin sliγ s temsalt-a ay deg Imarikaniyen kecmen deg wemgaru (ṭṭrad) akked Uzbikistan”, ay d-yenna. “Yuγ lḥal, ahat neqqel γer tallit n Rumsfeld, ur nuki”. (Islamabad, 29 Tubeṛ 2009 [Tanegga n yisalan tacinwat n Xinhua]). Dγa d wa ay d assirem akked ubeddel-nni ay yes ay aγ-yewεed Obama.  

 

 

Dduṛ n yimeẓla n wumel (services de renseignement) imarikaniyen deg tnekra n Balucistan i lmend n uhuddu n Pakistan iwekked-it-id daγen Uselmad Chossudovsky: “Deg 2005 yagi, Aseqqamu Aγelnaw n Wumel ed CIA ssuffγen-d aṛabul ay deg d-nnan ayen ara yeḍrun i Pakistan deg yimal am wayen yeḍran yagi “i Yuguslavya”, dγa, γef leḥsab n uṛabul-a, “seg-a γef εecṛa n yiseggasen, tamurt-a ad yesseγres wemgaru aγarim [guerre civil], imenγi ed wemseεdaw gar temnaḍin [prinvinces], akken ay nwala, seg melmi kan, deg Balucistan” (Energy Compass, 2 Meγres 2005). Γef leḥsab n Useqqamu Aγelnaw n Wumel akked CIA, Pakistan tetteddu i wakken ad teqqel, deg 2015, d “Awanak amezgul (Etat raté)” [am Ṣ̣umalya], d tamurt ara “yesswaγ wemgaru aγarim, d tin ara zerεent tekta n  Ṭaliban yerna ad d-yili deg-s yimenγi γef wanwa ara yeṭṭfen imrigen-nnes aγsiyen (armes nucléaires)”. (Times of India, 13 February 2005). Yuγ lḥal, Washington tebγa ad d-tennulfu tmurt tamaynut n “Balucistan Tameqrant” ara yesdukklen timiwa n Yibaliciyen n Pakistan, Iṛan ed tid n Afγanistan (ma yella wamek), yerna aya d asurif ara d-yerẓen asalu i lmend n uhuddu n tmura n Iṛan ed Pakistan” (The Destabilization of Pakistan, by Michel Chossudovsky, Global Research, December 30, 2007).

 

 

Ma d Iṛaniyen, seg yidis-nsen, ttuqennεen Imarikaniyen bγan ad d-snekren amgaru (ṭṭrad) deg tama-nsen n Balucistan: “Ṭehran, 29 Tubeṛ (tanegga tacinwat n yisalan Xinhua) – Aneṭṭaq n Wemni (parlement) iṛani, Ali Larijani yenna-d … llan kra n ttbutat ikmamen (concrets) ay d-yesskanayen attekki n Yiwunak Yeddukklen deg yiṭerḍiqen-nni ay d-yellan deg temnaḍt n Sistan-Balucistan, yerna gla-d s tmattant n medden, γef wakken d-tenna tnegga n yisalan IRNA … Tanṭagt-a taneγmanit (attentat suicide) d tarbaεt tasunnit n Juldullah (iserdasen n Ṛebbi) ay tt-igan deg wass n 18 Tubeṛ [2009] deg temnaḍt n Sistan-Balucistan, γef tlisa gar Iṛan ed Pakistan, yerna tella-d mi llan yemḍebbren n tama-a ssewjaden-d i yiwet n tmeγra ay deg imḍebbren n tewsatin (tribus) n tama-a ad mlilen ed yemḍebbren iserdasiyen n Tfekka n Yiεessasen n Tegrawla n Iṛan”.

 

 

Iswi n Yimarikanyen: ad gezmen deg Pakistan abrid n upitṛul ara yettwabnun gar Iṛan ed Ccinwa

 

 

Ayγer ay εewwlen Yimarikaniyen ad bḍun Pakistan ? Yiwet n ssebba nettat Pakistan d tamsisit tasuddast (alliée stratégique) yerna d tacrikt tameqrant n Ccinwa, yerna Imarikaniyen ed Yebriṭaniyen εewwlen akken ad ḥebsen annerni n Ccinwa deg umaḍal.  Yerna Pakistan tesεa azal ladγa imi ay tezmer ad tili d tiqenṭert ara yeqqnen igran n upitṛul n Iṛan (akked ahat ula d Lεiraq) γer Ccinwa, imi ass-a yella uxemmem γef lebni n yiqudas n upitṛul gar Wegmuḍ (Ccerq) Alemmas ed Ccinwa, d iqudas ara izegren idurar n Himalaya yerna ad kken γef Kacmir akken ad kecmen γer Ccinwa. Dγa d ta ay d taluft umi semman “Pipelinestan”.

 

 

Yuγ lḥal, lemmer ad yettwabnu uqadur am wa, aya yezmer ad as-yeḍmen i Ccinwa ad tesεu apitṛul war ma tella seddaw n leεnaya n Yimarikaniyen ed Yebriṭaniyen ay yeṭṭfen amesni (transport) n upitṛul deg yilel (lebḥeṛ), yerna war ma terra-ten tmara ad d-ttawyen apitṛul-nsen s yiγerruba ara izegren 19.000 n yikilumitren n yilel gar Wegmuḍ (Ccerq) Alemmas ed Ccinwa. Akken ay d-yenna yiwen n uṛabul n yisalan: “Ccinwa teḥṛes Iṛan i wakken ad tt-tejj ad tettejji deg usenfar-nni (projet) n uqadus n upitṛul yerna Pakistan, γas naqal tella tebγa ad teg leεqed ala ed Iṛan, imir-a teqbel ad tettekki Ccinwa yid-sent. Γef leḥsab n yiwen n ussizel (estimation), aqadus n upitṛul am wa yezmer ad as-d-yessekcam i Pakistan gar 200 ed 500 n yimelyunen n yidulaṛen deg useggas ala seg wezref n tikkin (droit de passage). Ccinwa ed Pakistan qeddcen yagi γef yiwen n usenfar n lebni n uqadus ara yekken γef yidurar n Himalaya akken ad yessiweḍ apitṛul n Wegmuḍ Alemmas γer Utaram (lγerb) n Ccinwa. Yuγ lḥal, abrid awezlan akk ay yezmer ad t-yaγ uqadus-a ara yessiwḍen apitṛul n Ubagu (Golfe) γer Ccinwa netta d tamurt n Pakistan … Aqadus-a ad yekk γef usagen (port) apakistani n Gwadar, sakkin ad yeḍfer abrid arurad (autoroute) n Karakoram akken ad yaweḍ γer Ccinwa, yerna Icinwaten ad ttekkin s tedrimt i lmend n lebni-nnes. Ccinwa tbennu, daγen, taγsart (station) n uṣ̣effi n upitṛul deg Gwadar. Apitṛul ara yawḍen γer Ccinwa s uqadus-a d win ara yejjen tamurt-a ad tessenqes seg upitṛul ay d-tettawey s yilel (lebḥeṛ) yerna tessukkuy-it γef wazzi (détroit) n Malacca ay iḥersen yerna yella deg-s umihi (danger), ladγa imi 80% seg upitṛul n Ccinwa ittekk γef wemkan-a. Pakistan tessefray ad tebnu, ḍaven, abrid n wuzzal [n tmacint] ara yeqqnen Ccinwa γer Gwadar. Nnig waya, yella wawal i wakken ad ttwabnun yiqudas n lgaz ara d-yawyen lgaz n South Pars, deg Iṛan, win n Qaṭar ed win n Daulatabad, deg Turkministan γer usagen Gwadar, anda ara d-mlilen akk i wakken ad yenz lgaz-nni deg umaḍal”. (“Pakistan, Iran sign gas pipeline deal”, by Syed Fazl-e-Haider, Asia Times, 27 May 2009). D acu kan, ma yella timura-a akk ttemsefhament gar-asent s talwit i wakken yal yiwet ad as-tekf nnfeε-nnes i tayeḍ yerna ad d-sfaydint akk, Imarikaniyen ed Yebriṭaniyen εewwlen ad d-kksen nnfeε-nsen s ccwal ed ad sxeṣ̣ren akk tikli-a tazedgant.

 

 

Iqudas n upitṛul ed lgaz ara yeddun seg Iṛan γer Ccinwa yerna ad zegren Pakistan d wid ara yessiwḍen afud (énergie) γer Ccinwa yerna ad jjen tadamsa tacinwat ad tennerni ugar deg Wegmuḍ (Ccerq) Alemmas. Dγa aya yezmer ad yesseḍεef tazmert n Yimarikaniyen ed Yebriṭaniyen deg tama-a, d ayen ur zmiren ad t-qeblen yineggura-a ay yebγan ad kemmlen ad ilin d nitni kan ay d tinezmarin (puissances) tiwḥidin deg umaḍal.

 

Imkariyen (mercenaires) n tkebbanit n Blackwater 

 

Ass-a, bdan-d yagi Yiwunak Yeddukklen tazniwt-nsen (propagande) akken ad εerḍen ad sqenεen Imarikaniyen ed ten-jjen ad amnen Pakistan teqqel d tamurt tamaynut n tremmiγt (rrebrab). Ṛebεa-nni n yimeγban ay d-yettwaṭṭfen  yerna cikken deg-sen tekkan deg wenguz-nni (complot) n wesṭerḍeq n tsinagugt deg Riverdale, Bronx, New York, sbubben-asen kullec akken ad ten-qqnen γer terbaεt n Jaish-e-Mohammad (ay deg yella ccek), d tin ay d-nnan, zuna, d tarbaεt taremmaγt (tarebrabt) tapakistanit. D aya daγen ay yeḍran i xemsa-nni n Yinselmen n Ugafa (nord) n Virginia ay d-yettwaṭṭfen, seg melmi kan, deg temdint n Lahore, deg Pakistan.  

 

 

Lhend ed Iṛan

 

 

Deg wayen d-yerzan timura tijaṛtin n Pakistan: Lhend, ass-a, d Manmohan Singh ay tt-yeṭṭfen, yerna nesḥissif imi, γef wakken nettwali, tamurt-a teqbel ad turar dduṛ n tin ara yesxesren isenfaren (projets) yellan gar Pakistan ed Ccinwa, akken ad tεawen Imarkaniyen ed Yebriṭaniyen. Dγa, nezmer ad d-nini ssebbat ara yejjen tamsalt-a ad d-teglu s yixeṣ̣ṣ̣aren imeqranen wejdent akk. Yuγ lḥal, yif-it ma yella teqbel Lhend ad teg talwit ara idumen akked Pakistan, ed ad teffeγ seg Yeγzer n Kacmir, d tama ay deg 95% seg yimezdaγen d Inselmen yerna bγan ad qqnen γer Pakistan. Lemmer taluft-a ur tferru, werjin ad tili talwit deg Lhend.

 

 

Ma d Iṛan, γef wakken d-yenna George Friedman, imḍebber n tnegga n wumel (agence de renseignement) n Stratfor, i terga n Russia Today: taγawsa tamaynut tameqrant akk ara d-yeḍrun deg εecṛa-a n yiseggasen ay d-itteddun netta d tadukli gar Yiwunak Yeddukklen ed Iṛan mgal Rusya. Lemmer ad d-yeḍru waya, Iṛan tezmer ad tegzem apitṛul-nnes ay tettazen i Ccinwa. Yuγ lḥal, d ta ay d tasuddest (stratégie) n Brzezinski. Γef waya, d lawan i wakken amussu mgal amgaru (mouvement anti-guerre) ad yewliwel i wakken ad yeḥbes urar-a uffir n Obama ay deg yesnernay ccwal i lmend n wemgaru, d urar yugaren ula d anγaten-nni n wemgaru (crimes de guerre) ay gan yimagaẓen imaynuten (néoconservateurs) n Bush ed Cheney. Yuγ lḥal, ass-a, wid yettekkan deg Wurar-a Ameqran la ttḥakaṛen nnfeε ur nesεi tilisa.

 

 

Sγur Webster G. Tarpley

Tasuqilt sγur : Omar Mouffok

Taγbalut: http://www.voltairenet.org/article163281.html

 

 

Webster G. Tarpley d ameskar (auteur), d aneγmas, d aselmad yerna d azaγan (critique) n tsertit tabeṛṛanit ed tsertit n daxel n Yiwunak Yeddukklen. Idlisen-nnes ineggura nitni d « Obama, The Postmodern Coup », « The Making of a Manchurian Candidante”, “Barack Obama: The Unauthorized Biography” akked “9/11 Synthetic Terror”. Tarpley yettekka deg Usarag n Ugellus n Talwit (Axis for Peace).

 

 

Γer daγen:

 

Afγanistan ed Pakistan: anda ay tewḥel Marikan  (Tadiwennit ed Mohamed Hassan, sγur Grégoire Lalieu ed Michel Collon ) 

 

Iwunak Yeddukklen bγan ad hudden Pakistan (sγur Rashid Zubair)